Misir ictimaiyyəti Ermənistanın təcavüzkar əməlləri barədə məlumatlandırılıb
Qahirə, 7 aprel, AZƏRTAC
Azərbaycanın Misirdəki səfiri Tural Rzayev bu ölkənin aparıcı kütləvi informasiya vasitələrinin (“Əl-Əhram”, “Əl-Cumhuriyyə”, “Əl-Masr Əl-Yaum”, “Əl-Məsəiyyə” qəzetləri və “Əl-Əhram”ın nəzdində fəaliyyət göstərən “Dialoq” Strateji Araşdırmalar Mərkəzi) nümayəndələrinin iştirakı ilə mətbuat konfransı keçirib.
Səfir ölkələrimiz arasında ikitərəfli münasibətlərin hazırkı vəziyyətinə toxunaraq, əlaqələrin yaxşı səviyyədə olduğunu qeyd edib, Azərbaycan tərəfinin Misirlə bütün sahələrdə əməkdaşlığı inkişaf etdirməkdə maraqlı olduğunu və buna səy göstərdiyini bildirib.
O, cari il ərzində Misir-Azərbaycan müştərək iqtisadi komissiyasının 4-cü iclasının Qahirə şəhərində keçiriləcəyinin gözlənildiyini bildirərək, sözügedən komissiyanın iki ölkə arasında müxtəlif sahələrdə əməkdaşlığın inkişaf etdirilməsi baxımından mühüm addım hesab olunduğunu diqqətə çatdırıb.
İki ölkə arasında ticarət dövriyyəsinin son dörd il ərzində dörd milyard ABŞ dolları həcmində olduğunu vurğulayan səfir bu rəqəmin artırılmasında ölkəsinin maraqlı olduğunu qeyd edib. Həmçinin Azərbaycanın turizm imkanlarına toxunan səfir təkcə keçən il ərzində dörd milyon vətəndaşın ölkə xaricinə turizm məqsədilə səfər etdiyini, onun yalnız yeddi min nəfərinin Misirə səfər etdiyini bildirib, bu rəqəmin daha da artırılması üçün cari il aprel ayının sonunda Azərbaycanın xüsusi nümayəndə heyətinin Misirə səfərinin gözlənildiyini və birbaşa hava xəttinin açılması ilə bağlı danışıqların aparılacağını, eyni zamanda cari ilin may ayında Misirin Turizm Nazirliyinin Turizmin Təşviqatı İdarəsinin nümayəndə heyətinin Azərbaycana səfərinin gözlənildiyini vurğulayıb.
Misir və Azərbaycan arasında mədəniyyət sahəsindəki əməkdaşlığa toxunan səfir cari il ərzində Misirdə Azərbaycan mədəniyyəti günlərinin keçirilməsinin planlaşdırıldığını bildirib.
İki ölkə arasında müdafiə sənayesi sahəsindəki əməkdaşlıqdan danışan səfir cari ilin martında Misirin Müdafiə Nazirliyinin nümayəndə heyətinin Bakıya rəsmi səfərinə toxunub. Daha sonra T.Rzayev jurnalistlərin suallarını cavablandıraraq, son günlər regionda baş verən hadisələr və cərəyan edən gərginliklər barədə məlumat verib.
Səfir aprelin 2-nə keçən gecə və gün ərzində bütün cəbhə boyu Azərbaycan mövqelərinin və yaşayış məntəqələrinin düşmən tərəfindən intensiv atəşə məruz qalmasını bildirib. Atəşkəsin məqsədli şəkildə Ermənistan tərəfindən pozulduğunu və Ermənistan tərəfinin daha çox itkilər verdiyini bildirən səfir BMT Təhlükəsizlik Şurasının qəbul etdiyi məlum dörd qətnamənin indiyədək Ermənistan tərəfindən yerinə yetirilmədiyini və sülh danışıqlarının Ermənistanın tutduğu qeyri-konstruktiv mövqeyi səbəbindən heç bir nəticə vermədiyini vurğulayıb.
Daha sonra səfir Suriyada baş verən hadisələrə və qaçqınların miqrasiya problemlərinə toxunaraq, bəzi dünya dövlətləri tərəfindən suriyalı qaçqınların miqrant kimi qəbul olunmasında üzləşdikləri çətinlikdlərdən müqayisəli şəkildə danışaraq, bir milyondan artıq azərbaycanlının öz doğma torpağından məcburi şəkildə çıxarılaraq, qaçqın və köçkün vəziyyətə düşdüyünü, onların problemlərinin yalnız Azərbaycan tərəfindən həllini tapdığını bildirib.
Bundan başqa, səfir Ermənistan silahlı qüvvələrinin, tanklarının, ağır artilleriyasının Azərbaycan torpağında nə işi olduğunu sual edərək, Azərbaycanın ərazi bütövlüyünün və suverenliyinin beynəlxalq təşkilatlar tərəfindən tanındığını, Azərbaycan torpaqlarının 20 faizinin Ermənistan silahlı qüvvələri tərəfindən işğal olunduğunu, BMT Təhlükəsizlik Şurasının dörd qətnaməsinin Ermənistan silahlı qüvvələrinin işğal olunmuş Azərbaycan torpaqlarından dərhal və qeyri-şərtsiz çıxarılmasını tələb etdiyini jurnalistlərin diqqətinə çatdırıb. Lakin Ermənistan tərəfinin həmin qətnamələri indiyədək yerinə yetirməməsi və ATƏT-in Minsk qrupunun sədrliyi ilə aparılan sülh danışıqlarının da Ermənistanın tutduğu qeyri-konstruktiv mövqe səbəbindən nəticə vermədiyi vurğulanıb.
Səfir T.Rzayevin misirli jurnalistlərlə keçirdiyi mətbuat konfransı, həmçinin səfirliyin cəbhə bölgəsindəki vəziyyətlə bağlı verdiyi bəyanat Misirin aparıcı saytlarında geniş işıqlandırılıb.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
