Moldova qəzetində 20 Yanvar hadisələri haqqında məqalə dərc olunub
Bakı, 18 yanvar, AZƏRTAC
Kişineuda çıxan nüfuzlu “Ekspert novostey” qəzetində Moldova jurnalistləri Lora Qarniş və Sergey Ryabininin Bakıda 20 Yanvar faciəsinə həsr edilmiş böyük məqaləsi dərc olunub. “Qara Yanvar” məqaləsi “Müasir dövrün tarixi” rubrikasında yer alıb.
Məqalədə konkret faktlar və materiallar əsasında 26 il əvvəl sovet ordusunun Azərbaycan xalqına qarşı törətdiyi vəhşiliklərdən söz açılır. Məqalə müəllifləri o vaxtkı SSRİ rəhbərliyinin SSRİ Konstitusiyasını və Beynəlxalq hüquq normalarını pozması faktını xüsusi vurğulayıblar. Ordunun öz xalqına qarşı ağır texnika və odlu silahlardan istifadə etməsi nəticəsində 147 dinc sakin həlak olub, 744 nəfər yaralanıb.
Moldova jurnalistlərinin məqaləsində bildirilir ki, Azərbaycan xalqı bu gün də o məşum tarixi unutmur, faciənin günahsız qurbanlarının xatirəsini böyük ehtiramla yad edir.
Bölmənin digər xəbərləri
