Moldova-Ukrayna əməkdaşlığı yeni mərhələyə qədəm qoyur
Kiyev, 11 yanvar, AZƏRTAC
Moldovanın yeni Prezidenti Maya Sandu yanvarın 12-də Ukraynaya ilk rəsmi səfərini edəcək.
AZƏRTAC xəbər verir ki, Sandunun rəsmi səfəri Moldova ilə Ukrayna arasında əməkdaşlığın yeni mərhələsinə təkan verəcək. Moldova Prezidenti rəsmi səfəri çərçivəsində ukraynalı həmkarı Vladimir Zelenski, Ali Radanın sədri Dmitri Razumkov, Baş nazir Denis Şmıqalla ikitərəfli görüşlər keçirəcək.
Maya Sandu səfərdən əvvəl Ukrayna ilə müzakirə ediləcək bəzi məsələləri açıqlayıb.
“İki ölkə arasında cavabı tapılmayan bir sıra məsələlər var. Bunlar regionun təhlükəsizliyi, Avropa İttifaqına inteqrasiya, bu istiqamətdə aparılan islahatlar, sərhədlərin delimitasiyası, hidroelektrik stansiyasının istifadəsi məsələləridir”, - deyə Sandu mətbuata açıqlamasında bildirib.
Ekspertlər bu səfərin Ukrayna ilə Moldova arasındakı xroniki problemlərin həlli baxımından əhəmiyyətli olduğunu qeyd edirlər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
