MOSKVA XƏSTƏXANALARINDA BİR AZƏRBAYCAN VƏTƏNDAŞI, ÖZBƏKİSTAN VƏ UKRAYNA VƏTƏNDAŞI OLAN İKİ HƏMYERLİMİZ VAR
Onlardan biri, Azərbaycan vətəndaşı Maqsud Bayanoviç İbrahimov naməlumlar arasında olmuşdur. Onun müalicə olunduğu 36 nömrəli xəstəxanada AZƏRTAC-ın müxbirinə bildirmişlər ki, zərərçəkənin şəxsiyyəti xəstəxananın yanıq bölməsində aparılan cərrahiyyə əməliyyatından sonra onun tanışlarının köməyi ilə müəyyən edilmişdir. Həkimlər 30 yaşlı Maqsud İbrahimovun hazırda ağır vəziyyətdə olduğunu bildirirlər. O, partlayış zamanı ağır yanıq və digər yaralar almışdır.
Moskva xəstəxanalarında daha iki həmvətənimiz müalicə olunur. Onlardan biri 40 yaşlı Çərkəz Mahəddin oğlu Fətəliyev Özbəkistan vətəndaşıdır və 39 nömrəli xəstəxanada müalicə olunur. Onun vəziyyəti qənaətbəxşdir. Ç.Fətəliyev Bərdə rayonunda doğulmuş və 20 ilə yaxındır Özbəkistanda yaşayır. Onun sol ayağından cərrahiyyə əməliyyatı vasitəsilə metal qəlpə çıxarılmışdır. Partlayış nəticəsində sol yanağından və çiynindən də yaralanmışdır, 2 ilə yaxındır həmin bazarda işləyir.
Digər həmvətənimiz 28 yaşlı Cəlal Cabir oğlu Tanrıverdiyev Ukrayna vətəndaşıdır. Hazırda Moskvadakı 1 nömrəli xəstəxananın reanimasiya və travmatologiya bölməsində qəlpə yarasından müalicə olunur, vəziyyəti orta ağırdır.
Azərbaycanın Rusiyadakı səfirliyinin elçi-müşaviri Baxış Zeynalov AZƏRTAC-ın müxbirinə bildirmişdir ki, diplomatik nümayəndəliyimiz həmvətənlərimizi müalicə edən həkimlərlə və Moskva hökumətinin Səhiyyə departamenti ilə daim əlaqə saxlayır, səfirliyin əməkdaşları həmyerlilərimizə baş çəkir, onlara lazımi kömək göstərirlər.
Bölmənin digər xəbərləri
