MOSKVADA MİXAİL QUSMANIN “HAKİMİYYƏTİN FORMULU” KİTABININ TƏQDİMATI OLMUŞDUR
Xatırladaq ki, “Hakimiyyətin formulu” verilişlərinin yaradıcı kollektivi 2003-cü ildə Rusiya Federasiyasının ədəbiyyat və incəsənət sahəsində Dövlət mükafatına layiq görülmüşdür.
Mixail Qusman demişdir ki, həmin layihənin 5 yaşı var və bu müddət ərzində epoxalar ayrıcında taleyin hökmü ilə yeni demokratik ölkələrin tarixi simalarına, liderlərinə çevrilən insanların iştirakı ilə 70-dən çox proqram efirə çıxmışdır. Layihədən başlıca məqsəd ictimaiyyəti dövrümüzün böyük və çox maraqlı insanları ilə tanış etmək, onları qeyri-adi rakursda göstərmək, bir çox ölkələrin siyasəti və mədəniyyətindən danışmaqdır.
M.Qusman jurnalistlərin onun “Uğurlarının sirri nədədir, nə üçün bir çox dövlətlərin başçıları məhz onunla söhbətə hazırdırlar?” sualına cavabında demişdir ki, buna hazırda 100-dən çox yaşı olan və dünyanın 4 ən iri informasiya agentliyindən biri sayılan “İTAR-TASS” markası kömək edir. Onun sözlərinə görə, məhz bu, habelə ali vəzifəli insanların kabinetlərinə daxil ola bilən həmkarlarının və bu ölkələrin səfirliklərinin əməkdaşlarının köməyi sayəsində həmin qapılar onun üzünə açılır.
M.Qusman xüsusi vurğulamışdır ki, bu kitaba onun həyatının Vətənində, Bakıda keçirdiyi böyük hissəsi ilə bağlı müsahibələr də daxil edilmişdir. O demişdir: “Mən əslən Bakıdan, Azərbaycandanam və burada, şübhəsiz, hazırkı Prezident İlham Əliyevlə, - onun fotoşəkli kitabın hətta üz qabığında verilmişdir, - onun atası, bugünkü Azərbaycanın demokratik şəraitdə, yüksək səviyyəli sosial və iqtisadi normalarla yaşaması üçün çox iş görmüş ümummilli lider Heydər Əliyevlə müsahibələr daxildir.
Heydər Əliyevlə söhbət mənim üçün xüsusilə əlamətdar olmuşdur. Əvvəllər, gənclik dövrümdə Bakıda işləyən zaman onu uzaqdan görmüşdüm, Heydər Əliyev onda Azərbaycan Kommunist Partiyasının Mərkəzi Komitəsinə başçılıq edirdi. Uzun illər sonra onu Azərbaycan Prezidenti vəzifəsində gördüm və müsahibə götürdüm. Bu, çox açıq və ətraflı söhbət idi. Xüsusi qeyd etmək istəyirəm ki, Heydər Əliyev haqqında çəkdiyimiz film efirdə nəzərdə tutulduğundan çox getdi. Məsələ bundadır ki, proqramımızın formatı ənənəvi olaraq 26 dəqiqədir. Lakin Prezident Heydər Əliyevlə söhbət o dərəcədə maraqlı idi ki, biz istisnaya yol verdik. Birinci kanal bilərəkdən proqramın 39 dəqiqə davam etməsinə şərait yaratdı. Onunla söhbət belə dolğun və maraqlı alınmışdı”.
O vurğulamışdır ki, Azərbaycanın indiki Prezidenti, yeni və cavan lideri, atasının işini davam etdirən və demək lazımdır ki, çox uğurla davam etdirən İlham Əliyevlə söhbətin hələ də böyük təəssüratı altındadır.
“Hakimiyyətin formulu” kitabına ABŞ, Böyük Britaniya, İsrail, Almaniya, Çin, Misir, İordaniya prezidentləri və baş nazirləri, dövrümüzün digər tanınmış və böyük şəxsiyyətləri ilə müsahibələr daxildir.
Bölmənin digər xəbərləri
