Müasir Azərbaycanın qəhrəmanlıq salnaməsini yaradan Lider
Bakı, 23 dekabr, AZƏRTAC
Azərbaycan bu gün tarixinin ən qüdrətli dövrünü yaşayır. Dövlətimizin başçısı İlham Əliyevin uzun illər ərzində düşünülmüş və məqsədyönlü siyasəti ölkəmizin 44 günlük Vətən müharibəsində Qələbəsini və Azərbaycanın ərazi bütövlüyünün bərpa olunmasını təmin etdi. Müzəffər Ali Baş Komandanımızın qətiyyətindən güc alan şanlı Azərbaycan Ordusu cəbhənin bütün istiqamətlərində düşməni darmadağın edərək 30 il əsirlikdə qalan torpaqlarımızı azadlığa, əsl sahiblərinə qovuşdurdu.
Bu fikirləri AZƏRTAC-a açıqlamasında Milli Məclisin deputatı Naqif Həmzəyev bildirib.
Deputat qeyd edib ki, Azərbaycanın ərazi bütövlüyünü bərpa edən Lider kimi adı əbədi olaraq tarixə yazılan Prezident İlham Əliyev xalqımızın qəhrəmanlıq salnaməsini yaratdı. Cəmi 44 gün ərzində haqq savaşımız Qələbə ilə başa çatdı, tarixi ədalət zəfər çaldı.
Dövlətimizin başçısının qətiyyətli addımları, xalqa müraciətləri, qətiyyətlə söylədiyi hər söz, hər kəlmə cəmiyyətimizdə, dünyanın hansı nöqtəsində yaşamağından asılı olmayaraq, qəlbi Azərbaycanla döyünən hər bir insanda ruh yüksəkliyi yaratdı, böyükdən kiçiyə hər birimizi daxilən səfərbər etdi. Əsrlər keçəcək, tarix XXI əsrə məhz Prezidentimizin, Ali Baş Komandanımızn qətiyyəti, cəsur oğullarımızın polad iradəsi sayəsində qazanılan böyük Qələbə, Zəfər məqamından baxacaq. Azərbaycan tarixi də iki mərhələyə bölünəcək: böyük Qələbədən əvvəlki və sonrakı dövrlər.
Prezident İlham Əliyev tarixin ən güclü Azərbaycanını yaratdı. Xoşbəxt o xalqdır, o dövlətdir ki, onu yüksək rifaha, mədəni intibaha çatdıran iradəli, qətiyyətli liderləri var. Müstəqillik dövrümüzün ilk xilaskarlıq missiyası ulu öndər Heydər Əliyevə məxsusdur. Ulu Öndər xalqın arzu və tələbi ilə ölkə rəhbərliyinə qayıtdıqdan sonra Azərbaycanı xaos və anarxiyadan, özbaşınalıq və qanunsuzluqlardan, bir dövlət kimi məhv olmaqdan xilas etdi. Tariximizin ən böyük xilaskarlıq missiyasını isə Prezidentimiz, Ulu Öndərin layiqli varisi İlham Əliyev yerinə yetirdi. Həm də Ümummilli Liderin vəsiyyətlərini icra etməklə, “Həmişə fəxr etmişəm və bu gün də fəxr edirəm ki, mən azərbaycanlıyam!” deyən dahi şəxsiyyətin yarımçıq qalmış işlərini başa çatdırmaqla, Azərbaycanı müasir və qüdrətli dövlətə çevirməklə, xalqın ən müqəddəs arzusunu uğurla gerçəkləşdirməklə!
Azərbaycanın bugünkü dinamik inkişafı, iqtisadiyyatının yüksəlişi, düşmən üzərindəki möhtəşəm Zəfəri böyük öndər Heydər Əliyevin siyasi fəlsəfəsindən güc alıb. Azərbaycanın müstəqillik tarixinə qızıl hərflərlə yazılan möhtəşəm Qələbəni bizə Ulu Öndərin layiqli davamçısı, Müzəffər Ali Baş Komandan İlham Əliyevin misilsiz cəsarəti və rəşadətli Ordumuz nəsib etdi. Böyük Qələbəni al qanı ilə yazan şəhidlərimizin intiqamının alınması ilə qazanılan Zəfəri xalqımıza bəxş etməklə Prezident İlham Əliyev həm də həyatını Azərbaycana həsr edən, “Şuşasız Qarabağ, Qarabağsız Azərbaycan yoxdur” deyən Ulu Öndərin arzusunu reallaşdırdı. Xalqımızın ən böyük ağrısı, sağalmaz yarası torpaqlarımızın erməni işğalı altında qalması idi. Dahi şəxsiyyət Heydər Əliyevin layiqli varisi, Azərbaycan Prezidenti, Silahlı Qüvvələrimizin Müzəffər Ali Baş Komandanı, qüdrətli sərkərdə İlham Əliyevin rəhbərliyi ilə ərazi bütövlüyümüz hərbi-siyasi yolla bərpa edildi, “dəmir yumruq”la düşmənin başı əzildi, maddi sərvətlərimiz, mənəviyyatımız, mədəni dəyərlərimiz talandan, məhvdən xilas edildi. Nəhayət, 30 illik yurd həsrətimiz, ürəklərimizdəki Qarabağ nisgili sona çatdı, yüz minlərlə məcburi köçkün qəribçilikdən, Vətəndə yurd həsrəti çəkməkdən qurtuldu.
Bu Qələbə “Qarabağ Azərbaycandır və nida” deyən Prezident İlham Əliyev bir daha xalqa verdiyi bütün vədlərə sadiq olduğunu nümayiş etdirdi. Bu Zəfər dövlətimizin başçısının səbir, təmkin və iti siyasi-diplomatik zəka ilə həyata keçirdiyi məqsədyönlü, uzaqgörən siyasət sayəsində reallığa çevrildi.
Dövlətimizin başçısı tərəfindən həyata keçirilən düşünülmüş daxili və xarici siyasət nəticəsində bu gün Azərbaycan dünya birliyinin nüfuzlu üzvünə və etibarlı tərəfdaşına çevrilib. Artıq dünya birliyi ərazi bütövlüyünü öz gücü hesabına qısa müddətdə bərpa edən Azərbaycanın gücünü qəbul edir və Prezident İlham Əliyevin əzmlə həyata keçirdiyi strateji kurs sayəsində tarixinin ən parlaq mərhələsini yaşayan ölkəmizin humanitar, ictimai-siyasi, iqtisadi, hərbi uğurlarını layiqincə dəyərləndirir.
Bölmənin digər xəbərləri
