Hörmətli generallar, zabitlər, gizirlər, çavuşlar və əsgərlər!

Bu gün Silahlı Qüvvələrimizin həyatında əlamətdar hadisə baş verir. Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev növbəti dəfə Silahlı Qüvvələrimizin hərbi hissələrindən birinin şəxsi heyəti ilə görüşə gəlmişdir. Bu hadisə onun Azərbaycan Silahlı Qüvvələrinə nə qədər böyük önəm və qiymət verdiyinə dəlalət edir. İnanıram ki, bu görüş sizin hər birinizin həyatında unudulmaz hadisə olacaq və həmişə xatirinizdə yaşayacaqdır.

İcazə verin, Azərbaycan Respublikasının Prezidenti, Silahlı Qüvvələrin Ali baş komandanı cənab İlham Əliyevi sizin hər birinizin adından, Silahlı Qüvvələrin bütün şəxsi heyəti adından və şəxsən öz adımdan ürəkdən salamlayım.

Möhtərəm Prezident, cənab Ali baş komandan!

Siz bu il mayın 12-də Naxçıvanda hərbi hissədə döyüş bayraqlarını təqdim edərkən söylədiniz ki, yalnız ümummilli liderimiz Heydər Əliyevin 1993-cü ildə xalqın tələbi ilə Azərbaycan rəhbərliyinə qayıdışından, Prezident vəzifəsinə seçilməsindən sonra ölkəmizdə ordu quruculuğunda dönüş yarandı. O ildən başlayaraq son 10 il ərzində ordumuz gücləndi, inkişaf etdi və bu gün demək olar ki, bizim ordumuz çox yüksək səviyyədədir. Qarşıda duran bütün vəzifələri həll etməyə qadir bir ordudur. Sizin sözünüzə qüvvət olaraq, iftixar hissi ilə deyirəm ki, Azərbaycan Respublikasının Silahlı Qüvvələri ümummilli liderimiz Heydər Əliyevin doğma övladıdır.

Ümummilli liderimiz Heydər Əliyev milli dövlətçilik tariximizə elə dəyərli töhfələr vermişdir ki, onlar tarix durduqca yaşayacaqdır. Onlardan biri də 15 iyun Qurtuluş günüdür. Dünən bu dövlət bayramının 11 ili tamam oldu. İcazə verin, Silahlı Qüvvələrimizin bütün şəxsi heyətini və Sizi – Ali baş komandanı bu bayram münasibətilə təbrik edim, işinizdə uğurlar arzulayım.

Əgər bu gün Azərbaycan Respublikasının bir mərkəzdən idarə olunan vahid komandanlığa tabe, qarşısında qoyulan bütün döyüş tapşırıqlarını yerinə yetirməyi bacaran Silahlı Qüvvələri vardırsa, biz buna görə yalnız ümummilli liderimiz Heydər Əliyevin böyük xatirəsinə minnətdarıq. O, bu məqsədə nail olmaq üçün bütün gücünü və qüvvəsini, hətta həyatını belə əsirgəmədi. Onun əməlləri, gördüyü işlər, qoyub getdiyi irs və yaratdığı dövlətçilik sistemi xalqımızı və müstəqil Azərbaycan dövlətini yeni-yeni uğurlara aparacaqdır.

İcazə verin, Azərbaycan Silahlı Qüvvələrinin memarı, əbədiyaşar Ali baş komandanımız Heydər Əliyevin xatirəsini əbədiləşdirmək məqsədi ilə Cəmşid Naxçıvanski adına hərbi litseyin Naxçıvan filialının əvəzinə Heydər Əliyev adına Naxçıvan hərbi litseyinin yaradılması və Azərbaycan Ali Hərbi Məktəbinə Heydər Əliyevin adının verilməsi haqqında Fərman imzaladığınıza görə, Silahlı Qüvvələrimizin şəxsi heyəti və Müdafiə Nazirliyinin rəhbərliyi adından Sizə sonsuz minnətdarlığımı bildirim.

Möhtərəm Prezident!

Cənab Ali baş komandan!

Qürur hissi ilə qeyd edirəm ki, Azərbaycan Respublikasının Prezidenti və Silahlı Qüvvələrin Ali baş komandanı kimi Siz bu gün ümummilli liderimiz Heydər Əliyevin irsini yaşadır, bu siyasəti davam və inkişaf etdirirsiniz. Azərbaycan Silahlı Qüvvələrinə ardıcıl olaraq diqqət yetirir, dövlət qayğısını gücləndirir, onun günbəgün möhkəmlənməsi və sıralarının mətinləşməsi üçün əlinizdən gələni əsirgəmirsiniz. Bu diqqət və qayğı Silahlı Qüvvələrimizin bütün şəxsi heyətini döyüş hazırlığında yeni-yeni nailiyyətlərə ruhlandırır. Ərazi bütövlüyümüzün bərpası və düşmən üzərində tam qələbə qazanmaq üçün inamını artırır.

Möhtərəm Prezident, cənab Ali baş komandan!

Məruzə edirəm ki, hazırda Azərbaycan Silahlı Qüvvələrinin və qoşun növlərinin şəxsi heyəti döyüş hazırlığı planı üzrə təlim keçir və döyüş qabiliyyətini gücləndirir. Silahlı Qüvvələrimiz öz təkmilləşdirmə dövrünü yaşayır. Hərbi xidmət daha da mükəmməlləşir. Maddi-texniki təminat və təchizat güclənmişdir. Azərbaycan Silahlı Qüvvələrinin quruculuğu planlı surətdə davam etdirilir, qoşunların döyüşə və səfərbərliyə hazırlığı, döyüş və mənəvi psixoloji hazırlığı, idarəetmə orqanlarının hazırlanması, kadrların hazırlanması və yerləşdirilməsi, maddi-texniki təminat, hazırlıq planı və digər genetik sənədlər əsasında gerçəkləşdirilir.

Silahlı Qüvvələrin bütün növlərində hərbi hissə və birləşmələrdə komanda qərargah təlimləri və real döyüş şəraitinə yaxınlaşdırılmış səhiyyə təlimləri planlı surətdə həyata keçirilir. Qoşunların döyüşə və səfərbərliyə hazırlığı yüksək səviyyədə saxlanılır. Zabitlərin peşə hazırlığının səviyyəsi əhəmiyyətli dərəcədə yüksəlmişdir. Əməliyyat hazırlığının gedişində qərargah zabitlərinin taktiki və əməliyyat vərdişləri durmadan təkmilləşir. Döyüşün planlaşdırılması və hərtərəfli təminatının təşkili üzrə möhkəm bacarıq və vərdişlər əldə edilir. Hərbi hissələrin və bölmələrin idarə edilməsi üzrə qərargahların qarşılıqlı əlaqəsi təkmilləşdirilir. Silahlı Qüvvələrin şəxsi heyətlə komplektləşdirilməsi Ali baş komandanın göstərişlərinə və Azərbaycan Respublikasının hərbi qanunvericilik aktlarının tələblərinə uyğun olaraq yerinə yetirilir.

Əsas komanda qərargah vəzifələrinə ali hərbi təhsilli, mənəvi-fiziki və psixoloji cəhətdən hazırlıqlı, döyüş təcrübəsi olan peşəkar zabitlərin təyin edilməsi diqqət mərkəzindədir. Silahlı Qüvvələrin təhsil ocaqlarının müasir standartlara uyğun yeni proqramla hazırlanmış məzunlarının buraxılışları və bu işin daha da keyfiyyətlə həyata keçirilməsi üçün şərait yaratmışdır.

Azərbaycan Respublikası Silahlı Qüvvələrinin fəaliyyətinin əsas istiqamətlərindən biri onun beynəlxalq əlaqələrinin genişləndirilməsi və qabaqcıl dünya dövlətlərinin silahlı qüvvələrinin təcrübəsindən bəhrələnərək inkişaf etməkdən ibarətdir. Bu əməkdaşlığın bəhrəsi kimi, indi zabitlərimiz NATO-nun mənzil qərargahında və müxtəlif komandanlıqlarında xidmət edirlər. Azərbaycan Respublikası Silahlı Qüvvələrinin tərkibində sülhməramlı tabur yaradılmışdır. Bu taburun bölmələri hazırda Kosovoda, Əfqanıstanda və İraqda sülhməramlı əməliyyatlarda öz missiyalarını yerinə yetirirlər. Azərbaycan Silahlı Qüvvələrinin nümayəndələri NATO-nun “Sülh naminə tərəfdaşlıq” proqramı çərçivəsində keçirilən bütün tədbirlərdə fəal iştirak edirlər. Azərbaycan Respublikasında da NATO-nun “Sülh naminə tərəfdaşlıq” proqramı çərçivəsində tədbirlər həyata keçirilir.

2001-ci ilin noyabrında Bakıda Kooperativ Determineyşn çoxmillətli sülhməramlı komanda qərargah təlimləri keçirilmiş, bu ilin sentyabr ayında isə “Kooperativ Vester Fovd” səhiyyə təlimləri keçiriləcəkdir. Azərbaycan NATO ilə “Sülh naminə tərəfdaşlıq” proqramı çərçivəsində əməkdaşlığı yüksək səviyyədə davam etdirir. Bu əməkdaşlığın nəticəsi kimi, Siz Brüsselə səfəriniz zamanı, mayın 19-da NATO-nun baş katibinə “Fərdi tərəfdaşlığın fəaliyyət planı”nı təqdim etmisiniz. Qeyd edim ki, Azərbaycan tərəfdaş dövlətlər arasında bu planı NATO-ya təqdim edən ilk dövlətlərdəndir.

Azərbaycan Silahlı Qüvvələrində idman işinin, fiziki hazırlığın və kütləvi idman tədbirlərinin geniş şəkildə həyata keçirilməsi hərbi qulluqçuların döyüş səriştəsinin, hərbi tətbiqi vərdişlərinin və ustalıqlarının artırılmasına xidmət edir. Bu il Afinada keçiriləcək yay Olimpiya oyunlarında Silahlı Qüvvələrimizin 9 nəfər nümayəndəsi respublikamızı təmsil edəcəkdir.

Möhtərəm Prezident, cənab Ali baş komandan!

Siz Azərbaycan dövlətinin ən ağrılı problemi olan Ermənistan-Azərbaycan münaqişəsinin həlli istiqamətində ümummilli liderimiz Heydər Əliyevin siyasətini davam etdirirsiniz. Diqqətinizə çatdırıram ki, Azərbaycan Silahlı Qüvvələrinin şəxsi heyəti Sizin həyata keçirdiyiniz daxili və xarici siyasəti dəstəkləyir. Vətən torpaqlarını erməni işğalçılarından təmizləmək uğrunda hər bir fədakarlığa hazırdır. Mən xalqımızı və Sizi əmin edirəm ki, hər bir əsgər, çavuş, gizir, zabit və general iradənizlə Azərbaycan Respublikasının ərazi bütövlüyünü bərpa etmək üçün tərəddüd etmədən silaha sarılmağı öz həyatından üstün tutacaqdır. Çox sağ olun!

X X X

Azərbaycan Prezidenti görüşdə nitq söylədi.