Müharibə veteranı: Ailəmlə birgə doğma Füzuliyə qayıtdığım üçün çox sevincliyəm
Bakı, 10 oktyabr, AZƏRTAC
Allahdan aralarında mənim nəvəm də olmaqla, bütün şəhidlərimizə rəhmət, qazilərimizə cansağlığı diləyirəm. Bizə bu günləri yaşadan Prezident, Müzəffər Ali Baş Komandan İlham Əliyevə minnətdarıq. Tanrı dövlətimizi, Ordumuzu qorusun.
Bu sözləri AZƏRTAC-a açıqlamasında Füzuli sakini, Birinci Qarabağ müharibəsi veteranı, şəhid babası Rəşid Abbasov oktyabrın 10-da Qaradağ rayonundakı “Qobu park 3” yaşayış kompleksindən Füzuli rayonuna yolasalma mərasimi zamanı deyib.
Birinci Qarabağ müharibəsi veteranı Vətəninə, ana yurduna qayıtdığı üçün çox sevindiyini bildirib.
“Nəvəm Qarabağda aparılan antiterror tədbirləri zamanı 19 yaşında şəhid oldu. Onun itkisi bizi ağrıtsa da, əldə olunan nəticələrlə qürur duyuram. Özüm Ağdərə döyüşlərində iştirak etmişəm. Ərazi bütövlüyümüz tam bərpa olunan gün uçmağa bircə qanadım yox idi. Biz torpaqlarımızı azad etməklə şəhidlərimizin ruhunu şad etdik. Vətən sağ olsun”, - deyə R.Abbasov vurğulayıb.
Bu gün ailəsi ilə birgə doğma Füzuliyə qayıtdığı üçün çox sevincli olduğunu deyən sakin əvvəllər inşaatda işlədiyini və bundan sonra doğma yurdda aparılan yenidənqurma işlərində canla-başla çalışmağa hazır olduğunu dilə gətirib.
“Hazırda Ağdama yol tikintisində sürücü kimi çalışıram. Oğlum da sürücüdür, o da mənimlə birgə tikintidə çalışır. Qeyd edim ki, rayondakı evlərin avadanlıqlarını da biz daşımışıq. Yüksək standartlara cavab verən evlər tikilib. Mənə dördotaqlı, şəhid anası olan qızıma isə ikiotaqlı ev verilib. Dövlətimizdən çox razıyıq”, - deyə Füzuli sakini bildirib.
Bölmənin digər xəbərləri
