Musa Konate: İslam haqqında obyektiv məlumatların yayılması islamofobiya ilə mübarizədə mühüm rol oynayır
Bakı, 26 may, AZƏRTAC
Bakıda keçirilən islamofobiya üzrə beynəlxalq konfransda artıq üçüncü dəfə iştirak edirəm. Bu cür tədbirlər beynəlxalq ictimaiyyət üçün əhəmiyyətlidir. İslam haqqında obyektiv məlumatların yayılması islamofobiya ilə mübarizədə mühüm rol oynayır. Çoxları İslam dini ilə bağlı yanlış təsəvvürlərə sahibdir. Müsəlmanların zorakılığa meyilli olduqları və terrorizmlə əlaqələndirilmələri tamamilə məlumatsızlıqdan irəli gəlir. Tədris və maarifləndirmə fəaliyyətləri bu stereotiplərin aradan qaldırılmasında əsas vasitə olmalıdır.
Bu sözləri AZƏRTAC-a Qərbi Afrika ölkəsi Burkina-Fasodan “İslamofobiya: Qərəzin ifşa olunması və stiqmaların dağıdılması” adlı beynəlxalq konfransa qatılan Musa Konate açıqlamasında söyləyib.
O, Avropa ölkələrində, xüsusilə Fransa və Skandinaviya dövlətlərində islamofobiyanın artmaqda olduğunu qeyd edib: “Bu ölkələrdə insanlar bəzən islamın sülh dini olduğunu bilmirlər. Halbuki İslam mədəni və ziyalı insanlar tərəfindən ibadət edilən bir dindir”.
O, həmçinin beynəlxalq ictimaiyyətin regiondakı məsələlərə münasibətinə də toxunub. İkinci Qarabağ müharibəsi zamanı Fransanın Ermənistanı dəstəkləməsini təəssüf hissi ilə xatırladan M.Konate bunun əsas səbəbinin regionun tarix və coğrafiyası barədə yetərli biliyin olmaması ilə əlaqəli olduğunu bildirib. “Fransa öz maraqlarını ön planda tutaraq reallıqları düzgün qiymətləndirmədi”, - deyə o əlavə edib.
Musa Konate islamofobiya ilə mübarizədə dialoqun, təhsilin və beynəlxalq əməkdaşlığın vacibliyini vurğulayıb.
Bölmənin digər xəbərləri
