Nazir: Əmək bazarı ilə bağlı ciddi elmi-tədqiqatlara ehtiyac var
Bakı, 21 dekabr, AZƏRTAC
Təhsil sistemi olaraq bizim ən böyük ehtiyaclarımızdan biri tələbələrin təhsil aldıqları dövrdə aidiyyəti təcrübə proqramlarına cəlb olunmasıdır. Bu, düşünürəm ki, məşğulluğa töhfə verə biləcək çox vacib bir istiqamətdir. Əgər tələbə təhsil aldığı dövrdə işəgötürənlə ünsiyyətdə olursa, həm işə götürən, həm də tələbə üçün bunun faydalı olduğuna inanırıq. Odur ki, bu istiqamətdə təşviqedici təcrübə proqramları artırılmalıdır.
AZƏRTAC xəbər verir ki, bunu elm və təhsil naziri Emin Əmrullayev “Azərbaycan Karyera İnkişaf Forumu”nda çıxışı zamanı deyib.
E.Əmrullayevin sözlərinə görə, hər bir ali təhsil müəssisəsinin özünəməxsus işəgötürənlər və iş strategiyası olmalıdır.
"Azərbaycanın işğaldan azad olunmuş ərazilərindəki yenidənqurma işləri nə qədər iş yeri deməkdir. Vacibdir ki, həmin ixtisaslara uyğun kadr hazırlayaq", - deyə E.Əmrullayev bildirib.
Nazir əmək bazarı ilə bağlı ciddi elmi-tədqiqatlara ehtiyac olduğunu, həmçinin özəl və dövlət sektorlarındakı işəgötürənlərlə ali təhsil müəssisələri arasındakı tələbə-təcrübə proqramlarının sayını dəfələrlə artırmağın vacibliyini qeyd edib.
Bölmənin digər xəbərləri
