Nazir müavini: Qərbi Azərbaycanla bağlı təqdimatlar tariximizi daha çox tanıtdıracaq
Ankara, 31 may, AZƏRTAC
Azərbaycan Mədəniyyət Nazirliyi xaricdə keçirilən tədbirlərində Qərbi Azərbaycanın mədəni irsinə də xüsusi yer ayırır.
Bu fikirləri Ankarada səfərdə olan mədəniyyət nazirinin müavini Səadət Yusifova AZƏRTAC-a açıqlamasında bildirib.
Nazir müavini qeyd edib ki, Qərbi Azərbaycanda formalaşmış Azərbaycan mədəni mühitinin ən görkəmli nümayəndələrindən biri olan, XIX əsrdə İrəvanda yaşamış məşhur rəssam, portretçi və ornamentçi Mirzə Qədim İrəvaninin anadan olmasının 200 illiyi münasibətilə Ankarada film nümayişi və sərgi təşkil edilib. “Ümid edirik ki, bu kimi mədəni tədbirlər Azərbaycan ilə Türkiyə arasında mövcud olan mədəni dialoqu daha da gücləndirəcək, dövlət başçılarımızın həyata keçirdiyi vahid Türk dünyası siyasətinə töhfə verəcək və xalqlarımız arasında bağların möhkəmlənməsinə xidmət edəcək,” – deyə Səadət Yusifova vurğulayıb.
Onun sözlərinə görə, müxtəlif ölkələrdə fəaliyyət göstərən Azərbaycan Mədəniyyət Mərkəzləri Qərbi Azərbaycanın mədəni irsinin təbliğində fəal iştirak edirlər. Nazir müavini əlavə edib ki, Azərbaycan Mədəniyyət Nazirliyinin sifarişi ilə istehsal olunmuş, Mirzə Qədim İrəvaninin yaradıcılığına həsr edilmiş “Cənnət yuxusu” adlı bədii-sənədli film xarici dillərə tərcümə olunaraq digər ölkələrin sənətsevərlərinə də təqdim ediləcək.
“Bu film vasitəsilə, həmçinin indiki Ermənistan ərazisindən deportasiya olunmuş azərbaycanlıların və onların yaratdığı mədəni irsin faciəli taleyi dünya ictimaiyyətinə çatdırılır. Ümid edirik ki, bu təqdimatlar Azərbaycan tarixinin beynəlxalq aləmdə daha geniş tanıdılmasına xidmət edəcək, son iki əsrdə xalqımızın üzləşdiyi çətinlikləri türkiyəli qardaşlarımız daha dərindən anlayacaq və hiss edəcək”, - deyə Səadət Yusifova bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
