Nərimanov rayonunda oteldə karantin rejimi qaydalarının pozulduğu aşkarlanıb
Bakı, 25 noyabr, AZƏRTAC
Dəfələrlə edilən xəbərdarlıqlara baxmayaraq hələ də bəzi ictimai-iaşə obyektlərində müştərilərə qəlyan təklif olunan hallarına rast gəlinir.
Daxili İşlər Nazirliyinin mətbuat xidmətindən AZƏRTAC-a bildirilib ki, nazirliyin Baş İctimai Təhlükəsizlik İdarəsinin əməkdaşlarının keçirdikləri nəzarət-profilaktiki tədbirlər zamanı paytaxtın Nərimanov rayonu ərazisindəki “Pure Boutique Hotel” otelində karantin rejimi qaydalarının pozularaq qəlyan məmulatlarından istifadə edilməklə müştərilərə xidmət göstərilməsi müəyyənləşib.
Otelin icarədarı Y.Tapdıqzadə və üç işçi saxlanılaraq müvafiq tədbirlərin görülməsi üçün Nərimanov Rayon Polis İdarəsinə təhvil veriliblər.
Qeyd edək ki, karantin rejimi tələblərinin təmin edilməsi, koronavirus infeksiyasının yayılmasının qarşısının alınması məqsədilə, eyni zamanda, qəlyandan istifadə olunmasına şərait yaradan məkanların aşkarlanması istiqamətində daxili işlər orqanlarının əməkdaşları paytaxt ərazisində, eləcə də bölgələrdə nəzarət-profilaktik tədbirləri davam etdirirlər.
Bölmənin digər xəbərləri
