Niderlandda İkinci Dünya müharibəsinin azərbaycanlı qəhrəmanının xatirəsi anılıb
Bakı, 31 avqust, AZƏRTAC
Niderlandın Osterveyk şəhərində İkinci Dünya müharibəsi zamanı ölkədə partizan hərəkatının fəallarından olan və “Medo” ləqəbi ilə tanınmış həmyerlimiz Məmməd Məmmədovun xatirəsi anılıb.
Azərbaycan Respublikasının Niderland Krallığındakı səfirliyindən AZƏRTAC-a bildirilib ki, anım tədbirində səfir Fikrət Axundov, Osterveyk şəhərinin meri Hans Yansen, M.Məmmədovun Niderlandda yaşayan ailə üzvləri, səfirliyin əməkdaşları, şəhər ictimaiyyətinin və Azərbaycan diasporunun nümayəndələri iştirak ediblər.
F.Axundov İkinci Dünya müharibəsi zamanı Avropanın faşizmdən azad edilməsinə və orada demokratiyanın bərqərar olmasına azərbaycanlıların verdiyi töhfələrdən danışıb, müharibədə 600 minə yaxın azərbaycanlının iştirak etdiyini, onlardan yarıdan çoxunun qəhrəmancasına həlak olduğunu diqqətə çatdırıb. Səfir 128-dən çox azərbaycanlının Sovet İttifaqı Qəhrəmanı adına layiq görüldüyünü, azərbaycanlı Mehdi Hüseynzadə, Əhmədiyyə Cəbrayılov və Cavad Hakimli kimi qəhrəmanların Avropanın müxtəlif ölkələrində partizan hərəkatlarına rəhbərlik etdiyini xatırladıb. Diplomat Məmməd Məmmədovun qəhrəmanlığına görə 1996-cı ildə Niderland Kralı tərəfindən onu “Orange-Nassau” ordeninin cəngavər dərəcəsi ilə təltif edildiyini bildirib, hələ iki ölkə arasında diplomatik əlaqələrin mövcud olmasından əvvəl həmyerlimizin ilk körpülər yaratdığını diqqətə çatdırıb. Niderlandın Osterveyk və “Medo”nun ata yurdu olan Zaqatalanın qardaşlaşmış şəhərlər olduğunu bildirən səfir Zaqatalada M.Məmmədovun ev-muzeyinin açıldığını diqqətə çatdırıb. F.Axundov 2020-ci il mayın 28-nin Osterveykdə Azərbaycan Günü elan edilməsinə və bələdiyyə binasının üzərində ölkəmizin dövlət bayrağının asılmasına görə şəhər merinə minnətdarlığını bildirib.
Səfir Fikrət Axundov Niderlandda M.Məmmədovun xatirəsinin əbədiləşdirilməsi istiqamətində göstərdiyi səylərə görə Osterveyk şəhərinin meri H.Yansenə “Azərbaycan Respublikasının diplomatik xidmət orqanlarının 100 illiyi (1919-2019)” medalını təqdim edib.
Öz növbəsində H.Yansen ona göstərilən yüksək etimada görə təşəkkürünü ifadə edib.
M.Məmmədovun Niderlandda yaşayan qızı Nancy Doomen-Mamedov 2019-cu ilin mayında Azərbaycana səfəri zamanı Prezident İlham Əliyev və birinci xanım Mehriban Əliyevanın mayın 9-da İkinci Dünya müharibəsi veteranları və onların ailə üzvləri ilə Bakıda Həzi Aslanov heykəlinin önündə keçirdiyi görüşdən söhbət açıb, Azərbaycan rəhbərliyi ilə tanışlıq görüşündən məmnunluğunu ifadə edib. O, eyni zamanda, Bakının və Zaqatalanın inkişafının onda xoş təəssürat oyatdığını vurğulayıb, ailə üzvləri ilə birlikdə turist qismində Azərbaycana səfər etdiyini bildirib.
Sonda şəhər ictimaiyyətinin, M.Məmmədovun ailə üzvlərinin iştirakı ilə onun vaxtilə yaşadığı evin qarşısındakı xatirə lövhəsinin önünə əklil qoyulub, güllər düzülüb.
Bölmənin digər xəbərləri
