Nigar Arpadarai: Azərbaycan və Türkiyə COP31-ə hazırlıq çərçivəsində əməkdaşlığı gücləndirir - ŞƏRH
Bakı, 9 fevral, Pərvanə Qafarova, AZƏRTAC
İstanbulda COP31-in yol xəritəsinin müzakirəsinə həsr olunmuş düşərgə təşkil olunub. Tədbirdə “Zero Waste” (Sıfır Tullantı) Fondunun məsləhətçiləri və yüksəkvəzifəli nümayəndələri, Birləşmiş Millətlər Təşkilatının Sıfır Tullantılar üzrə Yüksək Səviyyəli Məsləhət Şurasının üzvləri, eləcə də COP31 üzrə yüksəksəviyyəli iqlim çempionu iştirak ediblər. Tədbir çərçivəsində Sıfır Tullantı Fondu Türkiyədə keçiriləcək COP31 prosesi üzrə strateji yol xəritəsini təqdim edib.
Bu barədə AZƏRTAC-a açıqlamasında Milli Məclisin deputatı, COP29-un iqlim dəyişmələri üzrə yüksəksəviyyəli çempionu Nigar Arpadarai bildirib.
“Bir neçə gün ərzində İstanbulda olduq. Bildiyiniz kimi, COP31 üzrə BMT-nin iqlim dəyişmələri üzrə yüksəksəviyyəli çempionu, Türkiyənin “Zero Waste” Fondunun sədri Samet Ağırbaşdır. Bu səbəbdən üçgünlük “Zero Waste Foundation Retreat” adlı belə bir tədbir təşkil olunub. Bu tədbir çərçivəsində həmkarlarımız COP29 zamanı əldə etdiyimiz təcrübə ilə maraqlanır, eyni zamanda “Zero Waste” mövzusunun COP gündəliyinə daxil edilməsi və bu istiqamətdə həyata keçirilən proqramlarla bağlı məsələlər ətrafında müzakirələr aparılırdı. Biz təcrübə mübadiləsi apardıq və COP31 komandası ilə sıx əməkdaşlıq etməyi planlaşdırırıq.
Qeyd etdiyim kimi, “Zero Waste Foundation”ın sədri Samet Ağırbaş COP31 üzrə BMT-nin yüksəksəviyyəli iqlim çempionudur və artıq çox güclü komanda formalaşıb. Biz onların hər biri ilə sıx əməkdaşlıq etdik və əminik ki, bu COP çox uğurlu olacaq. COP29 komandası olaraq biz də bu prosesdə onlara dəstək göstərməyə tam hazırıq”, – deyə o bildirib.
Qeyd edək ki, üçgünlük “Zero Waste Retreat” düşərgəsi çərçivəsində 31-ci Tərəflər Konfransına hazırlıq prosesinə real, ölçülə bilən və uzunmüddətli töhfə vermək məqsədilə tullantısız istehsala yönəlmiş yanaşmanın tətbiq imkanları hərtərəfli qiymətləndirilib.
Türkiyənin birinci xanımı, “Sıfır Tullantı” hərəkatının banisi, Fondun fəxri prezidenti və BMT-nin Sıfır Tullantılar üzrə Yüksək Səviyyəli Məsləhət Şurasının sədri Əminə Ərdoğanın rəhbərliyi və dəstəyi ilə fəaliyyətini davam etdirən “Zero Waste Foundation” COP31 ərəfəsində İstanbulda milli və beynəlxalq maraqlı tərəfləri bir araya gətirməklə mühüm strateji addım atıb.
Bu il noyabrın 9–dan 20-dək keçirilməsi nəzərdə tutulan COP31 öncəsi Türkiyədə təşkil olunan “Zero Waste Retreat” tədbiri dünyanın müxtəlif regionlarından yüksəksəviyyəli nümayəndələri bir araya gətirərək qlobal təcrübə mübadiləsi və gələcək əməkdaşlıq üçün platforma yaradıb. Tədbirdə “Zero Waste” Fondunun prezidenti və COP31 üzrə BMT-nin yüksəksəviyyəli iqlim çempionu Samed Ağırbaş, Türkiyənin ətraf mühit, şəhərsalma və iqlim dəyişikliyi nazirinin müavini Fatma Varank, Milli Məclisin deputatı, COP29 üzrə yüksəksəviyyəli iqlim çempionu Nigar Arpadarai, BMT-nin Sıfır Tullantılar üzrə Yüksək Səviyyəli Məsləhət Şurasının üzvü Lara Van Droyten, BMT-Habitatda siyasi məsələlər və yüksəksəviyyəli əlaqələr üzrə xüsusi müşavir və COP31 üzrə BMT-nin iqlim liderinin müşaviri Kris Mensa, BMT-Habitat İcraçı Direktorunun Aparatının baş katibi Nil Hor, BMT-nin Ətraf Mühit Proqramında (UNEP) marketinq, kommunikasiya və maraqlı tərəflərlə əlaqələr üzrə direktor və COP31 üzrə iqlim çempionunun müşaviri Atif İkram Butt, BMT-nin iqlim üzrə ölkə komandalarının rəhbəri Liza Larsen, COP30-un baş direktoru Ana Toni iştirak ediblər.
Məsləhətçi iclasda əvvəlki Tərəflər Konfranslarının təcrübəsi, qabaqcıl praktikalar, maraqlı tərəflər arasında əməkdaşlıq və tullantısız istehsal yanaşmasının iqlim dəyişmələri ilə mübarizə tədbirləri ilə qarşılıqlı əlaqəsi müzakirə olunub. Həmçinin tullantısız istehsal yanaşmasının COP31 prosesi çərçivəsində real şəraitdə tətbiq oluna bilən praktik model kimi təqdim edilməsi imkanları ətraflı qiymətləndirilib.
“Zero Waste Foundation” tərəfindən təşkil olunan tullantısız istehsal üzrə bu iclas COP31 üzrə BMT-nin yüksəksəviyyəli iqlim liderinin davamlı inkişaf, icra və nəticəyönümlülük prinsiplərinə sadiqliyini gücləndirən mühüm mərhələ kimi qiymətləndirilib.
Üç gün ərzində keçirilən qapalı və əyani sessiyalarda “Zero Waste” Fondunun 2026-cı il üçün strateji prioritetləri, həmin ilədək tullantıların sıfır səviyyəyə endirilməsi istiqamətində əsas təşəbbüslər kompleks şəkildə müzakirə olunub. “Sıfır tullantı” konsepsiyası COP31 çərçivəsində onun həyata keçirilməsinin ən diqqətçəkən istiqamətlərindən birinə çevriləcək.
Tullantısız istehsal üzrə iclas çərçivəsində aparılan qiymətləndirmələr göstərib ki, tullantıların azaldılmasına yönəlmiş yanaşma COP31 üzrə BMT-nin yüksəksəviyyəli iqlim liderinin qarşısında duran vəzifələrin əsas komponentlərindən biri olacaq.
Xatırladaq ki, 193 ölkə tərəfindən qəbul edilmiş sıfır tullantı hərəkatı ətraf mühitin və iqlimin mühafizəsi sahəsində mühüm qlobal istiqamət olaraq qalmaqdadır.
Əminə Ərdoğanın rəhbərliyi ilə hazırlanmış tullantısız istehsal konsepsiyasına uyğun olaraq “Zero Waste Foundation” COP31-i ekoloji cəhətdən təmiz metodların tətbiq olunduğu, uzunmüddətli nəticələrin əldə edildiyi və bu nəticələrin gələcəyə ötürüldüyü dönüş nöqtəsinə çevirməyi hədəfləyir.
Bu kontekstdə “Sıfır tullantı” yanaşması COP31 prosesinin əsas ideyalarından biri və onun praktik tətbiqinin ən bariz sahələrindən biri kimi təqdim ediləcək.
Bölmənin digər xəbərləri
