Nigar Əsgərova: Mədəniyyət və incəsənət xalqın mənəvi yaddaşını formalaşdırır
Bakı, 9 noyabr, Günel Alıyeva, AZƏRTAC
Zəfər Günü Azərbaycan xalqının yaddaşında əbədi qalacaq. İllər və əsrlər keçəcək, amma bu bayram nəsildən-nəslə ötürülərək ürəklərdə yaşayacaq. Axı bu, sadəcə bir tarix deyil, böyük Zəfərin və milli birliyin simvoludur.
AZƏRTAC xəbər verir ki, bu barədə Müslüm Maqomayev adına Azərbaycan Dövlət Akademik Filarmoniyasının solisti Nigar Əsgərova bildirib.
Müğənninin sözlərinə görə, Zəfər Günü təkcə qürur mənbəyi deyil, həm də dərin duyğu və minnətdarlıq anıdır.
“Bu xoşbəxtliyi, şərəfi bizə bəxş edən Ali Baş Komandana, şəhidlərə və qazilərimizə minnətdarıq. Onların cəsarəti və fədakarlığı sayəsində dinc səma altında yaşayırıq və Zəfərimiz haqqında qürurla danışa bilirik”, - deyə Nigar Əsgərova bildirib.
O, mədəniyyət və incəsənətin tarixin qəhrəmanlıq hadisələrini qorumaqda, millətin mənəvi yaddaşını formalaşdırmaqda xüsusi rol oynadığını vurğulayıb.
“İncəsənət həm də bir növ mübarizə, qalibiyyətli bir döyüşdür. Biz Zəfərimizi təkcə döyüş meydanında deyil, həm də ölkənin mənəvi həyatında qeyd edirik. Musiqi, festivallar, teatr və rəsm vasitəsilə xalqımızın cəsarəti, dözümlülüyü və sarsılmaz ruhunun xatirəsini gələcək nəsillərə ötürürük”, - deyə Filarmoniyanın solisti qeyd edib.
Bölmənin digər xəbərləri
