NİZAMİ RAYONUNDA NÖVBƏTİ MƏHƏLLƏLƏRARASI FUTBOL TURNİRİ BAŞLAMIŞDIR
AZƏRTAC xəbər verir ki, oktyabrın 10-da Nizami rayonundakı 70 nömrəli məktəbin meydançasında 18 oktyabr - Dövlət müstəqilliyi günü”nə həsr olunmuş məhəllələrarası mini-futbol turniri başlanmışdır.
Bakı Şəhər Gənclər və İdman Baş İdarəsinin və “Bakılı” futbol komandasının təşəbbüsü ilə keçirilən bu yarışda 12 komanda iştirak edir.
Turnirin açılış mərasimində çıxış edən Bakı Şəhər Gənclər və İdman Baş İdarəsinin rəisi Raqif Abbasov bildirmişdir ki, ölkəmizin gələcəyi xeyli dərəcədə fiziki cəhətdən sağlam nəslin yetişməsindən asılıdır. İdmanın hər bir insanın sağlamlığında xüsusi rol oynadığını qeyd edən R.Abbasov Azərbaycanda bu sahənin inkişafının dövlətin daim diqqət mərkəzində olduğunu söyləmişdir.
Bakı şəhəri üzrə uşaqlar arasında artıq 7-ci mini-futbol turnirinin keçirildiyini vurğulayan idarə rəisi demişdir ki, bu turnirlərdən birinin iştirakçısı 17 yaşlılardan ibarət Azərbaycan yığmasına baxışa dəvət almışdır. O, turnir iştirakçılarına ölkəmizin idman şərəfini ən mötəbər yarışlarda ləyaqətlə təmsil etməyi arzulamışdır.
Məhəllələrarası turnir 3 gün davam edəcək. Sonda qaliblər mükafatlandırılacaqlar.
Bölmənin digər xəbərləri
