Olimpiya lisenziyası qazanan taekvondoçu: Tarixə düşdüyüm üçün şadam
Bakı, 19 dekabr, AZƏRTAC
“Yarışın mənim üçün müsbət tərəfləri çox oldu. Azərbaycana Olimpiya lisenziyası qazandırdığıma görə çıxışımdan razı qaldım”.
AZƏRTAC xəbər verir ki, bu sözləri Çinin Usi şəhərində keçirilmiş Böyük Dəbilqənin təsnifat və Çempionlar mərhələsində iki qızıl və Olimpiya lisenziyası qazanan Azərbaycan taekvondoçusu Qaşım Maqomedov Heydər Əliyev Beynəlxalq Aeroportunda qarşılanma mərasimi zamanı jurnalistlərə açıqlamasında deyib.
58 kiloqram çəki dərəcəsində fəxri kürsüyə qalxan taekvondoçu cari idman ilinin onun üçün çətin keçdiyini bildirib: “Allaha şükürlər olsun, bu yarışda hər şey istədiyim kimi alındı. Nəticə məni qane edir. Şadam ki, Böyük Dəbilqədə qızıl medal qazanan ilk azərbaycanlı taekvondoçu kimi tarixə düşdüm. Öz işimi gördüm və məndən tələb olunanı etdim. Bizə hər zaman dəstək olan federasiya rəhbərliyinə, məşqçilərimə təşəkkürümü bildirirəm”.
Qarşıdakı planlarından da söz açan idmançı bir müddət istirahət edəcəyini söyləyib: “Buna layiq olduğumu düşünürəm. Sonra isə Cənubi Koreyada təlim-məşq toplanışımız olacaq. Ardınca yavaş-yavaş Olimpiadanın hazırlığına başlayacağıq”.
Bölmənin digər xəbərləri
