SİYASƏT
Oliver Pardo: Fransa Senatının qətnaməsi Azərbaycanda vəziyyətdən total məlumatsızlığı əks etdirir
Bakı, 22 yanvar, AZƏRTAC
Fransalı hüquqşünas, sabiq hakim və ölkənin ədliyyə nazirinin keçmiş birinci müşaviri Oliver Pardo hesab edir ki, Bakıya sanksiyaların tətbiqi tələbi ilə bu günlərdə Fransa Senatında qəbul olunan qalmaqallı qətnamə Azərbaycanda vəziyyətdən total məlumatsızlığı əks etdirir.
AZƏRTAC xəbər verir ki, ekspert CBC telekanalının “Anastasiya Lavrina ilə qlobal diskussiya” verilişinin efirində bu barədə deyib: “Fikrimcə, qalmaqallı olan bu qətnamə Azərbaycanda vəziyyətdən total məlumatsızlığı əks etdirir. Azərbaycanın Fransadakı səfiri ilə birgə hüquq üzrə ən yaxşı professorlar ilə görüşmək imkanımız oldu. Onlar hamısı bildirdilər ki, Azərbaycanın mövqeyi hüquqi baxımdan ədalətlidir, Ermənistanın mövqeyi isə əsassızdır. Onu da qeyd etmək yerinə düşər ki, Fransanın mövqeyi Ermənistanın mövqeyindən daha kəskindir. Bu, beynəlxalq hüquqdan tam xəbərsiz olmağın əlamətidir. Bizim qarşımızda böyük maarifçilik işi durur”.
Onun sözlərinə görə, erməni diasporu Fransanın çoxlu sayda şəhərlərini əhatə edən güclü lobbidir. “Erməni lobbisi qanunları bilməyən və ya vəziyyətdən kifayət qədər xəbərdar olmayanlara vəziyyəti öz prizmasından təqdim edərək, onlara təsir göstərir. Məsələ öz seçkiqabağı ambisiyaları naminə susmağa üstünlük verənlər üçün də aktualdır. Bu, beynəlxalq hüquq baxımından qalmaqaldır”, - deyə hüquqşünas qeyd edib.
O əlavə edib ki, lobbiləşmə təhdid və zorakılıq prinsipinə əsaslanıb: “Bizim öz ofisimiz ona görə zorakı hərəkətlərə məruz qalıb ki, biz Azərbaycanın hüquqlarını müdafiə etməklə öz işimizi görürük. Beynəlxalq hüquq Azərbaycanın tərəfindədir. Beynəlxalq hüquqa müvafiq olaraq, Qarabağ Azərbaycanın Ermənistan tərəfindən işğal olunan ərazisidir. Bu gün regionda baş verənlər Azərbaycanın qələbəsi sayəsindədir və yalnız ədalətin bərpasıdır”.
Bununla yanaşı, Oliver Pardo diqqəti Fransa Senatının qətnaməsində nə Xocalı qətliamı, nə də ermənilərin Qarabağın azərbaycanlı əhalisinin başına gətirdikləri müsibətlər barədə bir kəlmə də olmaması faktına çəkib.
“Biz həqiqəti qanunlara uyğun şəkildə irəli aparmaq üçün hər gün işləməliyik. Gəlin unutmayaq ki, Fransa təhlükəli oyun aparır. Fransa ATƏT-in Minsk qrupunun üzvüdür və ermənilərin tərəfində arbitr qismində çıxış edə bilməz”, - deyə sabiq hakim yekunda bildirib.