ON BEŞ NƏFƏR RABİTƏÇİ XİDMƏTİ MƏNZİLLƏRLƏ TƏMİN OLUNMUŞDUR

07.02.2004 [15:01]
Çap et
A⁺ A^-

Mənzil şəraiti ağır olan on beş nəfər rabitəçi xidməti mənzillə təmin olunmuşdur. Yeni mənzillərdə yaşayacaq rabitəçilərin əksəriyyəti Qarabağ müharibəsi iştirakçıları və Çernobıl əlilləridir.

Rabitə Nazirliyinin mətbuat xidmətindən AZƏRTAC-ın müxbirinə demişlər ki, nazirlikdə orderlərin təqdimat mərasimi keçirilmişdir. Rabitə naziri səlahiyyətlərini icra edən Nadir Əhmədov respublika Prezidenti İlham Əliyevin fəaliyyətə başlamasının 100 günü ərəfəsində bir sıra tədbirlərin həyata keçirildiyini və yeni rabitə obyektlərinin istifadəyə verildiyini bildirmişdir. O, hələ 70-ci illərdə ümummilli liderimiz Heydər Əliyevin zəhmət adamlarına göstərdiyi qayğıdan söz açmış, o böyük şəxsiyyətin ideya və arzularının bundan sonra da həyata keçirilməsinin zəruriliyini vurğulamışdır.

Sonra rabitəçilərə xidməti mənzillərin orderləri təqdim olunmuşdur.