“Oskar” qasırğası Kubada altı nəfərin həyatına son qoyub
Bakı, 22 oktyabr, AZƏRTAC
Kubanın şərqində sürəti saatda 120 kilometrə çatan “Oskar” qasırğası səbəbindən azı altı nəfər ölüb.
AZƏRTAC xəbər verir ki, “Associated Press” agentliyi bu barədə Kuba Prezidenti Migel Dias-Kanelə istinadla məlumat yayıb.
ABŞ-ın Qasırğaların İzlənməsi üzrə Milli Mərkəzi çərşənbə axşamı günü Kubanın şərqində daşqın və sürüşmə riski, həmçinin Baham adalarının cənub-şərqində mümkün daşqınlar barədə xəbərdarlıq edib. Mərkəzin son məlumatına görə, gücünü bir qədər itirən “Oskar” hazırda tropik fırtınaya çevrilib və saatda 14 kilometr sürətlə şimal-şərq istiqamətində, Baham adalarına doğru hərəkət edir.
Qeyd edək ki, “Oskar” qasırğası bazar günü yerli vaxtla saat 17:50-də Kubanın şərqindəki Quantanamo əyalətinə çatıb. Qasırğa Kubada yağış və daşqınlara səbəb olub.
Bölmənin digər xəbərləri
