Ötən il Azərbaycanda Dünya Bankının 13 Yol xəritəsi icra edilib
Bakı, 7 mart, AZƏRTAC
Bir il ərzində Biznes mühiti və beynəlxalq reytinqlər üzrə Komissiya çərçivəsində Azərbaycanda biznes mühitinin yaxşılaşdırılması sahəsində islahatlar həyata keçirilib. Xüsusilə Rəqabət Məcəlləsi, Vergi Məcəlləsində müvafiq dəyişikliklər, maliyyə sektoru üzrə strategiyanın qəbul olunmasını qeyd etmək lazımdır. Bütün bu qəbul olunmuş qanunvericilik aktları biznes mühitinin daha da yaxşılaşdırılmasına yönəlib.
AZƏRTAC xəbər verir ki, bu sözləri İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı “Biznes mühitinin yaxşılaşdırılması üzrə iqtisadi islahatlar və müasir çağırışlar” mövzusundakı konfransda deyib.
O bildirib ki, 2023-cü ildə Azərbaycanda Dünya Bankının “Business Ready” hesabatı ilə bağlı 13 Yol xəritəsi icra edilib.
“Ötən il yol xəritələri ilə yanaşı ümumilikdə 472 tədbir keçirilib, eləcə də digər mühüm istiqamətlər üzrə 14 fəaliyyət icra olunub. Görülən işlər qeyri-neft sektoruna özəl sərmayələrin cəlbini daha da təşviq edəcək və dayanıqlı inkişafı özündə ehtiva edəcək”, - deyə Vüsal Qasımlı əlavə edib.
Bölmənin digər xəbərləri
