Otuz gün koma vəziyyətində qalan qadının həyatı xilas edilib
Bakı, 27 dekabr, AZƏRTAC
Otuz gün koma vəziyyətində qalan qadının həyatı xilas edilib, xəstənin vəziyyəti yaxşıdır.
AZƏRTAC TƏBİB-in tabeliyindəki Kliniki Tibbi Mərkəzin rəsmi feysbuk səhifəsinə istinadla bildirir ki, mərkəzə gətirilərkən ağır koma vəziyyətində olan xəstədə hemodinamika problemi, ağır kəllə-beyin travması müəyyən edilib.
Mərkəzin Reanimasiya şöbəsinin müdiri Ülviyyə Qurbanovanın sözlərinə görə, xəstə 30 gün süni tənəffüs aparatında qalıb və müvafiq müalicələr alıb: “Xəstə yol-nəqliyyat hadisəsi nəticəsində ağır travma alıb və özəl tibb müəssisələrindən birinə aparılıb. Ağır vəziyyətdə, təcili yardım vasitəsilə Kliniki Tibbi Mərkəzə köçürülüb. Tibbi müayinələrdən sonra xəstəyə müştərək qapalı kəllə-beyin travması, baş-beyin əzilməsi, sol təpə gicgahın zədələnməsi, sol tərəfli qabırğaların, sol dirsək və sol körpücük sümüklərinin sınığı diaqnozu qoyulub. Bir aydan sonra xəstə süni tənəffüs aparatından ayrılıb. Hazırda xəstənin vəziyyəti yaxşıdır. Yaxın günlərdə palataya köçürülməsi planlaşdırılır”,- deyə Ü.Qurbanova qeyd edib.
Xəstənin atası Rahib Hacıyev qeyd edib ki, hadisə İsmayıllı rayonunda olub: “Təcili yardım maşını vasitəsilə qızımı özəl xəstəxanalardan birinə apardıq. İki gün özəl xəstəxanada qaldı. Daha sonra mən TƏBİB-ə müraciət etdim, qızımın müalicəsinin dövlət tibb müəssisələrində davam etdirilməsi üçün kömək istədim. Təcili yardım maşını ilə qızımı Kliniki Tibbi Mərkəzə köçürdülər. O qədər ağır vəziyyətdən onu həyata qaytarmağı bacardıqları üçün həkimlərə öz təşəkkürümü bildirirəm. Qızımın daha da yaxşı olub, ayağa qalxacağına inanıram”.
Qeyd edilib ki, xəstənin bütün müalicə xərcləri icbari tibbi sığorta ilə qarşılanıb.
Bölmənin digər xəbərləri
