PALÇIQ VULKANLARINA BİTİŞİK ƏRAZİLƏRƏ QORUQ STATUSU VERİLƏCƏKDİR
Ekologiya və Təbii Sərvətlər Nazirliyi Azərbaycanın təbiət abidələri siyahısına daxil edilmiş 23 palçıq vulkanından 5-nin yaxınlığındakı ərazilərə qoruq statusu verilməsi məqsədi ilə Nazirlər Kabinetinə təqdim etmək üçün torpaq sahələrinin ayrılmasına dair sənədlər hazırlamışdır. AZƏRTAC-ın müxbirinə bu barədə nazirliyin mətbuat xidmətindən məlumat vermişlər. Azərbaycanda 300-dən çox palçıq vulkanı var və onların sayına görə ölkəmiz dünyada birinci yeri tutur.
Nazirliyin mütəxəssisləri təbiətin mühafizə olunduğu ərazilər şəbəkəsinin inkişaf etdirilməsi sahəsində məqsədyönlü iş aparırlar. Hazırda Azərbaycanda 6 milli park, 13 dövlət təbii qoruğu və 21 dövlət yasaqlığı var. Azərbaycanda xüsusi qorunan təbii ərazilərin ümumi sahəsi 604,5 min hektar və ya ölkə ərazisinin 8 faizini təşkil edir.
Bölmənin digər xəbərləri
