PARALİMPİYAÇIMIZ OXATMA ÜZRƏ DÜNYA ÇEMPİONATINDA İŞTİRAK EDİR
AZƏRTAC xəbər verir ki, oktyabrın 1-dən 10-dək Koreya Respublikasının Çoncu şəhərində paralimpiyaçılar arasında kamandan oxatma üzrə növbəti dünya çempionatı keçirilir.
Bu çempionatda ilk 3 yeri tutan idmançılar Pekin Yay Olimpiya Oyunlarına birbaşa lisenziya qazanacaqlar. Həmin yarışda ölkəmizi Zinyət Vəliyeva təmsil edir.
Kamandan oxatma paralimpiya idman növü üzrə bölmə ölkəmizdə 2005-ci ildən fəaliyyət göstərir. İdmançılarımız mötəbər beynəlxalq yarışlarda ilk dəfə ötən ilin avqustunda Çexiyada keçirilən Avropa çempionatında debüt etmişlər. Həmin çempionatda Zinyət Vəliyeva 796 xal nəticə göstərmişdir.
Koreyada isə Zinyət Vəliyeva 970 xal nəticə ilə həm də paralimpiyaçılar arasında özünəməxsus respublika rekordunu 174 xal yaxşılaşdırmışdır.
Z. Vəliyevanın Pekinə lisenziya qazanıb-qazanmaması məsələsi ilin axırında Beynəlxalq Paralimpiya Komitəsinin elan edəcəyi reytinq siyahısından sonra məlum olacaqdır.
Paralimpiyaçımız oktyabrın 10-da Vətənə qayıdacaqdır.
Bölmənin digər xəbərləri
