Parisdə Xocalı faciəsindən bəhs edən “Sonsuz dəhliz” filminin təqdimatı olub
Paris, 25 fevral, AZƏRTAC
Fevralın 24-də Parisdəki Azərbaycan mədəniyyət mərkəzində ölkəmizin Fransadakı səfirliyinin və Avropa-Azərbaycan Cəmiyyətinin təşkilatçılığı ilə Xocalı faciəsindən bəhs edən “Sonsuz dəhliz” filminin təqdimatı olub.
Tədbirdə Xocalı faciəsi zamanı ermənilər tərəfindən qətlə yetirilən şəhidlərin xatirəsi bir dəqiqəlik sükutla yad edilib.
Təqdimatda çıxış edən səfir Elçin Əmirbəyov Xocalı soyqırımının XX əsrin ən faciəvi hadisələrindən biri olduğunu, onun 25-ildən artıq davam edən Ermənistan-Azərbaycan, Dağlıq Qarabağ münaqişəsinin ən dəhşətli və bəşəriyyətə qarşı yönələn soyqırımı kimi yaddaşlarda əbədi iz buraxdığını diqqətə çatdırıb.
Fevralın 25-dən 26-na keçən gecə qəsbkar ermənilər tərəfindən 613 xocalının, o cümlədən günahsız 106 qadının, 63 uşağın və 70 yaşlı insanın görünməmiş qəddarlıqla qətlə yetirildiyini qeyd edən diplomat azərbaycanlılara qarşı bu qətliəmın ermənilərin etnik təmizləmə siyasətinin tərkib hissəsi olduğunu xüsusi vurğulayıb.
Səfir ermənilərin törətdiyi Xocalı soyqırımının Cenevrə Konvensiyası və BMT-nin İnsan Haqları təşkilatı tərəfindən pislənildiyini bildirib.
Xocalı soyqırımının unudulmaması və dünya ictimaiyyətinə hərtərəfli çatdırılması üçün Heydər Əliyev Fondunun vitse-prezidenti Leyla Əliyevanın rəhbərliyi ilə 2008-ci il may ayının 8-dən etibarən “Xocalıya ədalət!” beynəlxalq təşviqat kampaniyasının hər il qeyd edildiyini vurğulayan Elçin Əmirbəyov məhz bu kampaniya sayəsində dünyanın onlarla ölkəsinin parlamenti tərəfindən Xocalı faciəsinin tanındığını bildirib. O, nə vaxtsa fransız rəsmlərinin də mülki vətəndaşlara qarşı törədilən soyqırımı aktını tanıyacaqlarına ümidvar olduğunu bildirib.
Avropa-Azərbaycan Cəmiyyətinin Parisdəki ofisinin rəhbəri Marie-Laetitia Gourdin Xocalı şəhərinin fevralın 25-dən 26-na keçən gecə ermənilərin hücumuna məruz qaldığını və müdhiş gecədə yüzlərlə dinc sakinin qətlə yetirildiyini bildirib. O, Xocalı faciəsinin dünya ictimaiyyətinə çatdırılması məqsədilə Heydər Əliyev Fondunun vitse-prezidenti Leyla Əliyevanın rəhbərliyi ilə “ Xocalıya ədalət!” kampaniyasının keçirildiyini diqqətə çatdırıb.
Avropa-Azərbaycan Cəmiyyətinin bu kampaniya çərçivəsində Avropanın müxtəlif ölkələrində silsilə tədbirlər keçirdiyini diqqətə çatdıran ofis rəhbəri bu axşam Xocalı faciəsinin 23-cü ildönümü ilə əlaqədar ilk dəfə Fransada “Sonsuz dəhliz” sənədli filminin nümayişinin həmin tədbirlərin davamı olduğunu bəyan edib.
Azərbaycan əzəl ərazisi Dağlıq Qarabağ və ona bitişik yeddi rayonumuzun ermənilər tərəfindən qəsb edildiyini xatırladan Maris-Laetitia Gourdin işğalın bu gün də davam etdiyini, azərbaycanlılara qarşı etnik təmizləmə siyasəti aparan ermənilərin yüzminlərlə azərbaycanlının vaxtilə yaşadıqları ata-baba yurdlarından silah gücünə çıxarıldığını bildirib.
BMT Təhlükəsizlik Şurasının və digər beynəlxalq təşkilatların işğal edilən Azərbaycan ərazilərinin heç bir şərt qoymadan dərhal azad edilməsi barədə qətnamələrinə Ermənistanın əməl etmədiyini diqqətə çatdıran ofis rəhbəri, işğalçılıq siyasətinin bu gün də davam etdiyini, bu yaxınlarda ermənilər tərəfindən girov götürülən iki azərbaycanlının mühakimə olunduğunu və heç bir beynəlxalq təşkilatlar tərəfindən bu məhkəmə prosesinin tanınmadığını və yaxın vaxtlarda işğal olunmuş ərazilərin azad ediləcəyinə ümidvar olduğunu qeyd edib.
Çıxışında belə ağrılı anlarda Azərbaycan xalqının dərdinə şərik olduğunu diqqətə çatdıran Azərbaycanın Dostları Assosasiyasının sədri , Milli Assambleyanın deputatı Jan-Fransua Mansel Qafqaz bölgəsində sülhün bərqərar olması arzusunu səsləndirib.
Sonra Xocalı faciəsinin ağrılarını, ermənilərin vəhşiliyini əks etdirən “Sonsuz dəhliz” filmi nümayiş etdirilib.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
