PARLAMENT XƏBƏRLƏRİ
Milli Məclisin mətbuat xidmətindən AZƏRTAC-a bildirmişlər ki, Fransa Senatının təşəbbüsü ilə aprelin 8-də və 9-da Parisdə Fransa-Qafqaz dostluq qrupunun yığıncağı keçiriləcəkdir. Tədbirdə Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov, deputatlar Əli Əlirzayev, Gülər Əhmədova, Vəsadət Əzizov və Əliməmməd Nuriyev iştirak edəcəklər.
Dostluq qrupunun yığıncağında Cənubi Qafqazda vəziyyət, regional münaqişələrin həlli yolları, parlamentlərarası əlaqələrin inkişafı, islahatların hüquqi bazasının yaradılmasında təcrübə mübadiləsi və digər məsələlər müzakirə olunacaqdır.
Səfər müddətində deputatlarımız Fransa Senatının, Avropa Şurası Parlament Assambleyası monitorinq qrupunun rəhbərləri ilə görüşlər keçirəcək, ölkənin xarici işlər nazirliyində olacaqlar.
X x x
Milli Məclisin deputatları Siyavuş Novruzov və Ağabəy Əsgərov NATO Parlament Assambleyasının siyasi, müdafiə və təhlükəsizlik, habelə elm və texnologiya komitələrinin birgə iclasında iştirak etmək üçün aprelin 8-dən 12-dək Sankt-Peterburqda səfərdə olacaqlar.
İclasda İraqda vəziyyət, onun beynəlxalq münasibətlərə təsiri, NATO ilə əlaqələrin inkişafı, hərbi islahatların aparılması və müdafiə sahəsində əməkdaşlıq məsələləri müzakirə olunacaqdır.
Bölmənin digər xəbərləri
