Parlamentdə “Kosmik fəaliyyət haqqında” qanun layihəsi qəbul edilib
Bakı, 24 iyun, AZƏRTAC
Milli Məclis Azərbaycan Respublikası Konstitusiyasının 94-cü maddəsinin I hissəsinin 10-cu, 11-ci, 13-cü və 23-cü bəndlərinə uyğun olaraq ölkədə kosmik fəaliyyətin qanunla tənzimləməsini həyata keçirən “Kosmik fəaliyyət haqqında” qanun layihəsini təsdiqləyib.
AZƏRTAC xəbər verir ki, üçüncü oxunuşda təqdim olunan yeni qanun layihəsi Milli Məclisin iyunun 24-də keçirilən iclasında müzakirəyə çıxarılıb.
6 fəsil 24 maddədən ibarət olan qanun layihəsi Azərbaycan Respublikasında kosmik fəaliyyətin hüquqi, iqtisadi və təşkilati əsaslarını, kosmik fəzada milli fəaliyyətin həyata keçirilməsi və kosmik sənayedə sahibkarlıq fəaliyyəti ilə bağlı münasibətləri tənzimləyir. Sənəd kosmik fəaliyyətin dövlət tənzimlənməsi, kosmik obyektlərin dövlət qeydiyyatı, kosmik fəaliyyətin iqtisadi xüsusiyyətləri və təhlükəsizliyin təyin edilməsi kimi məsələləri özündə ehtiva edir.
Qanun layihəsinə əsasən, kosmik fəzada telekommunikasiya, məsafədən müşahidə, naviqasiya və digər təyinatlı kosmik obyektlər qanunun tələblərinə uyğun istifadəyə verilir. Telekommunikasiya peykləri vasitəsilə peyk rabitəsi, telekommunikasiya xidmətləri, yüksəksürətli peyk internet xidməti, radio və televiziya yayımı, verilənlərin ötürülməsi və digər telekommunikasiya peyk xidmətlərinin göstərilməsi ölkə daxilində və xaricdə həyata keçirilir.
Milli kosmik operator Azərbaycan Respublikasının, habelə xarici ölkələrin telekommunikasiya peykləri vasitəsilə ölkə daxilində və xaricdə peyk sistemləri və telekommunikasiya peyk şəbəkələri təşkil edir.
Sənədə görə, Azərbaycan ərazisində aşkarlanmış kosmik obyekt üzərində mülkiyyət hüququ müqaviləyə və mülki qanunvericiliyə uyğun müəyyən ediləcək. Belə ki, kosmik fəaliyyət subyektlərinin kosmik obyektlər üzərində mülkiyyət və digər əşya hüquqlarının əmələ gəlməsi, əhdudlaşdırılması (yüklülüyü), başqasına keçməsi və bu hüquqlara xitam verilməsi müvafiq icra hakimiyyəti orqanının müəyyən etdiyi orqan (qurum) tərəfindən müəyyən edilmiş qaydada Reyestrdə qeydiyyata alınmalıdır.
Həmçinin kosmik fəzada olan kosmik obyektin bu Qanunun tələblərinə əməl etməklə özgəninkiləşdirilməsinə, dövlət mülkiyyətində olan kosmik obyektlərin “Dövlət əmlakının özəlləşdirilməsi haqqında” Qanuna uyğun olaraq özəlləşdirilməsinə, həmçinin müqavilə əsasında sığorta ödənişi müqabilində sığortaçılara keçməsinə yol verilir.
Reyestrdə qeydiyyata alınmış kosmik obyektlərə, həmçinin belə kosmik obyektlərin orbitdən çıxarılmasına dair məlumatlar milli kosmik operator tərəfindən Müqavilədə nəzərdə tutulmuş qaydada BMT-yə təqdim edilir.
Qeyd edək ki, Azərbaycan 2013-cü ildən öz süni peyklərini Yerin orbitinə çıxarıb.
Qanun dərc edildiyi tarixdən 60 gün sonra qüvvəyə minir.
Qanun layihəsi müzakirələrdən sonra üçüncü oxunuşda qəbul edilib.
Bölmənin digər xəbərləri
