“Paşinyanı “demokrat”, separatçıları isə “hərbi əsir” kimi qələmə vermək riyakarlığın pik həddidir” – Deputat
Bakı, 13 oktyabr, AZƏRTAC
Bakıda keçiriləcək COP29-a sayılı günlər qaldıqca Ermənistan və onun havadarlarının Azərbaycana qarşı çirkin kampaniyaları genişlənib. Son günlər ölkəmizdə insan haqlarının vəziyyətinə dair tez-tez müzakirələr təşkil edən beynəlxalq təşkilatları, xarici ölkələri narahat edən, əslində, başqa məsələlərdir. Onlar Azərbaycan tərəfindən həbs edilmiş keçmiş separatçı rejimin nümayəndələrini və terrorçuları “hərbi əsir” kimi qələmə verərək onların azad olunmasını tələb edirlər. Azərbaycana qarşı ərazi iddiaları sürən, konstitusion quruluşu dəyişdirməyə cəhd göstərən, ərazilərimizdə quldur dəstələri yaradan, torpaqlarımızı minalayan, insanlarımızı qətlə yetirən separatçıların müdafiəsinə qalxan avropalılar görəsən onların müharibədən əvvəl ölkəmizin ünvanına səsləndirdikləri ittihamlarla tanışdılarmı? İndi etnik xislətlərinə uyğun olaraq özlərini “əzik”, “fağır” aparan ermənilər müharibədən əvvəl “Azərbaycan xalqını Xəzərə tökmək” niyyətlərini açıq ifadə edirdilər. Prezident İlham Əliyevin də qeyd etdiyi kimi, onlar Bakıya qədər gələcəklərini deyirdilər, gəldilər, amma qolları qandallı, gözləri bağlı.
Bu fikirləri AZƏRTAC-a açıqlamasında Milli Məclisin deputatı Mehriban Vəliyeva səsləndirib.
O bildirib ki, Ermənistan rəhbərliyi və onların Qarabağı könüllü tərk etmiş tör-töküntüləri nə müharibədən əvvəl, nə müharibə zamanı və nə də sonrakı dövrdə Azərbaycana qarşı ideologiyalarını dəyişməyiblər. “Təəssüf ki, bəziləri hələ də Ermənistanın baş naziri Nikol Paşinyana “demokrat”, “sülhpərvər” kimi baxırlar. Hətta bizim bəzi radikallar da “Paşinyan Azərbaycanın ərazi bütövlüyünü tanıyır, ona Qarabağ lazım deyil” kimi ifadələr işlədirlər. Unutmayaq ki, Paşinyan Azərbaycana qarşı ərazi iddiaları, hədə-qorxular səsləndirməkdə Qarabağın işğal olunmasında iştirak etmiş Serj Sarkisyan, Robert Köçəryandan heç də geri qalmır. Məhz Paşinyan idi ki, “Qarabağ Ermənistandır və nöqtə” deməklə bütün danışıqların üzərindən xətt çəkmişdi. Cıdır düzündə yallı gedən, Cəbrayıla yol çəkmək, Şuşada parlament binası tikmək istəyən də Paşinyan idi. Müharibədən az sonra Ermənistanın baş nazirinin dırnaqarası “Dağlıq Qarabağ respublikası”nın qondarma müstəqilliyi münasibətilə təbriki də yaddan çıxmayıb. Yəni, Nikol Paşinyanın bu gün etdiyi çıxışla öncəki fəaliyyəti arasında dərin uçurum var. Ermənistanın baş nazirinin dedikləri və imzaladıqları tam ziddiyyət təşkil edir. Çünki ötən ilin oktyabrında Ermənistanın baş naziri Qarabağı Azərbaycanın tərkib hissəsi kimi tanıyıb və həmin ruhda olan çoxsaylı bəyanatlardan sonra separatçılara təbrik göndərmək tamamilə qəbuledilməz idi. 44 günlük müharibədən əvvəl “yeni ərazilər uğrunda yeni müharibə” şüarı ilə çıxış edən də Paşinyanın müdafiə naziri David Tonoyan idi. Onların avantürist çıxışları, hədə-qorxuları, düşünülməmiş addımları nəticəsində 2020-ci il sentyabrın 27-də müharibə başladı. Erməni baş nazir istəsəydi, kapitulyasiya aktını 10 noyabrda deyil, daha tez imzalaya bilərdi. Minlərlə erməni və azərbaycanlı hərbçinin ölümünə baiskar olan Paşinyanın əli hər iki xalqın qanına batdı”, - deyə deputat qeyd edib.
O diqqətə çatdırıb ki, hazırda Bakıda məhkumluq həyatı yaşayan erməni separatçıları “hərbi əsir” kimi qələmə vermək qanunun aliliyinə hörmətsiz yanaşmaqdır. “Azərbaycan müharibədən əvvəl və sonra erməni separatçılarına silahı yerə qoymağı və təslim olmağı təklif edib. Dövlət olaraq onları bağışlayacağımızı bəyan etmişdik. Amma onlar dövlətimizin çağırışlarına məhəl qoymadılar. Hazırda erməni separatçılar haqq etdikləri cəzalarını çəkirlər. Ayrı-ayrı dövlətlərin, beynəlxalq təşkilatların onları “hərbi əsirlər” kimi təqdim etmələri yolverilməzdir. Azərbaycan ərazisində separatçılıq, qəsdən adam öldürmə, işgəncə, terrorçuluq və insanlıq əleyhinə digər cinayətlər törədən şəxslərin həbsi beynəlxalq konvensiyaların tələbidir. Otuz il Azərbaycan torpaqlarını işğal altında saxlayan, yüz minlərlə vətəndaşımızı öz yurd-yuvalarından didərgin salan separatçıların gözünü qan elə örtmüşdü ki, onlar Kür çayına qədər olan ərazilərə iddia edirdilər. Onlar Azərbaycan dövlətini və xalqını Mingəçevirdəki su anbarını partlatmaqla hədələyirdilər. Təbii ki, separatçıların hərbi cinayətlərini, insanlıq əleyhinə suçlarını heç zaman bağışlamaq olmaz. Azərbaycan dövləti qanunun aliliyinə, Ordunun gücünə arxalanaraq ölkədə separatizmin kökünü kəsdi, caniləri həbs edərək Bakıya gətirdi. Bununla da biz bütün dünyaya öz gücümüzü, qanunun aliliyinə sədaqətimizi, ədalətimizi nümayiş etdirdik”, - deyə M.Vəliyeva vurğulayıb.
Bölmənin digər xəbərləri
