Penni Vonq: Livan və İsrail arasında atəşkəs Qəzzada döyüşlərə son qoya bilər
Bakı, 27 noyabr, AZƏRTAC
Livanda “Hizbullah” hərəkatı ilə İsrail arasında əldə edilən atəşkəs razılaşması Qəzza sektorunda hərbi əməliyyatların dayandırılması üçün katalizatora çevrilməlidir.
AZƏRTAC xəbər verir ki, bu barədə Avstraliyanın xarici işlər naziri Penni Vonqun bəyanatında deyilir.
“Avstraliya “Hizbullah” hərəkatı ilə İsrail arasında hərbi əməliyyatlara son qoyacaq atəşkəs razılaşmasını alqışlayır. Bu, sərhədin hər iki tərəfindəki köçkünlərin evlərinə qayıtmasını təmin etmək üçün mühüm addımdır”, - deyə Penni Vonq bildirib.
Nazir, həmçinin Livanda əldə olunan atəşkəsin bölgədəki gərginliyi azaltmağa kömək edəcəyini vurğulayıb.
Avstraliyanın xarici siyasət idarəsinin rəhbəri rəsmi Kanberranın tərəfləri atəşkəs razılaşmasının şərtlərinə ciddi şəkildə əməl etməyə çağırdığını deyib. Onun sözlərinə görə, Livandakı atəşkəs razılaşması Qəzza sektorunda müharibənin sona çatması üçün katalizator olmalıdır.
Qeyd edək ki, bir müddət öncə İsrailin hərbi-siyasi kabineti Livanda atəşkəs planını təsdiqləyib. Məlumata görə, “Hizbullah” və İsrail arasında əldə edilən razılaşmaya əsasən, hərəkatın silahlı dəstələri Litani çayının şimalına çəkilməli, Livan Silahlı Qüvvələri 60 gün ərzində həmin mövqelərə yerləşməli və İsrail ordusu tədricən Livan ərazisindən çıxmalıdır.
Bölmənin digər xəbərləri
