PERMLİ İŞ ADAMLARI AZƏRBAYCANDAN KƏND TƏSƏRRÜFATI MƏHSULLARI ALACAQLAR
Ölkəmizdə işgüzar səfərdə olan Rusiyanın Perm vilayətinin iş adamları Azərbaycandan kənd təsərrüfatı məhsulları almaq niyyətindədirlər. Əvəzində isə Perm vilayətindən Azərbaycana iqtisadiyyatın müxtəlif sahələrində istifadə olunan metal və sintetik materiallardan toxunma torlar, kənd təsərrüfatı məhsullarının qablaşdırılması üçün müxtəlif növ qutular, yanğınsöndürən avadanlıq üçün köpükləndirici maddələr göndəriləcəkdir. Bu barədə Perm və Azərbaycanın iş adamları arasında ilkin razılıq əldə edilmişdir.
İqtisadi İnkişaf Nazirliyindən müxbirimizə bildirmişlər ki, Perm vilayətinin 15 şirkətindən 22 iş adamı respublikamızda səfərdə olarkən kənd təsərrüfatı məhsullarının istehsalına daha çox diqqət yetirmişdir. Azərbaycanda olduqları 5 gün ərzində permli biznesmenlər respublikamızın 100-dək iş adamı ilə görüşlər keçirmiş, təcrübə və fikir mübadiləsi aparmışlar.
Danışıqlarda iqtisadi əlaqələri genişləndirməyə dair bir neçə təklif də müzakirə olunmuşdur.
Bölmənin digər xəbərləri
