Peskov: Ukrayna böhranını bir gecədə həll etmək mümkün deyil
Moskva, 26 oktyabr, AZƏRTAC
Donald Trampın səmimi olaraq bütün qlobal münaqişələri həll etmək istəyi müsbət hisslər doğurur, lakin Ukraynadakı böhranı bir gecədə həll etmək mümkün deyil.
AZƏRTAC xəbər verir ki, bu barədə Rusiya Prezidentinin mətbuat katibi Dmitri Peskov “Moskva. Kreml. Putin” verilişinin müəllifi və həmaparıcısı Pavel Zarubinə verdiyi müsahibədə bildirib.
Onun sözlərinə görə, ABŞ Prezidenti Donald Trampın bütün kəskin böhranları həll etmək istəyinə baxmayaraq, dərin köklü səbəbləri olan Ukrayna münaqişəsi tez bir zamanda həll etmək üçün həddindən artıq mürəkkəbdir.
ABŞ-ın “Lukoil” və “Rosneft” şirkətlərinə qarşı tətbiq edilən sanksiyaları şərh edərək, Peskov onları Rusiyaya qarşı qeyri-dost addım adlandırıb.
O vurğulayıb ki, Moskva ABŞ da daxil olmaqla bütün ölkələrlə mehriban münasibətlər qurmağa çalışır, lakin yeni sanksiyalar ikitərəfli əlaqələrin bərpası perspektivlərinə xələl gətirir. “Bu o demək deyil ki, biz bu səylərimizdən imtina etməliyik. Biz özümüz üçün faydalı olanı etməliyik”, - deyə Peskov əlavə edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
