PFL Azərbaycan Kubokuna sponsorluqla bağlı bir neçə şirkətlə danışıqlar aparır
Bakı, 18 sentyabr, AZƏRTAC
Azərbaycan Kubokuna sponsorluqla bağlı 3-4 şirkətlə aktiv danışıqlarımız davam edir. Ümid edirik ki, müsbət nəticəyə gələcəyik.
AZƏRTAC xəbər verir ki, bu sözləri Peşəkar Futbol Liqasının (PFL) texniki-idman direktoru Elgiz Abbasov ölkə kubokunda yeni mövsümün püşkatma mərasimindən sonra jurnalistlərə açıqlamasında deyib.
PFL rəsmisi bildirib ki, hazırda müxtəlif variantlar dəyərləndirilir: “Həm bizə, həm də biz tərəfdən müraciətlər var. Yeni sponsor elə şirkət olmalıdır ki, Azərbaycan Kubokunun adını özündə yaxşı şəkildə ehtiva edə bilsin. Odur ki, biz danışıqlarımızı davam etdiririk. Deməzdim ki, tələsmirik. Əksinə, bu məsələnin tez bir zamanda tamamlanmasını istəyirik ki, biz də bu final oyunu ilə bağlı müvafiq layihələrimizi həyata keçirə bilək”.
E.Abbasov final matçının Gəncə şəhər stadionuna salınmasının səbəbini də açıqlayıb: “Son illərdə bir neçə stadion Azərbaycan Kubokunun finalına ev sahibliyi edib. Bütün stadionlar bizim üçün potensial namizəd idi. Amma Gəncədəki stadionunun xüsusi özəlliyi var. Tarixi məkandır, həm də yenidənqurmadan sonra belə nüfuzlu matçın burada baş tutması maraqlı olacaq”.
Qeyd edək ki, Azərbaycan Kubokunda bu mövsüm 34 komanda iştirak edəcək. Final matçı 2027-ci il mayın 12-də Gəncə stadionunda keçiriləcək.
Bölmənin digər xəbərləri
