Politoloq: Ağdam, Laçın və Kəlbəcərin döyüşsüz azad edilməsi hərbi-siyasi Zəfərimizin bariz nümunəsidir
Bakı, 10 noyabr, Səadət Hakıyeva, AZƏRTAC
Mübarizliyi və cəsurluğu ilə seçilən Azərbaycan xalqı tarixboyu müstəqilliyə can atması ilə regiondakı digər xalqlardan seçilib. Böyük imperiyaların hədəfində olması da, Azərbaycanı daim gərgin mübarizələrin və qaynar hadisələrin mərkəzinə çevirib.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri Xəyal Bəşirov deyib.
Politoloq bildirib ki, XIX əsrin əvvəllərindən başlayaraq artıq planın növbəti mərhələsi, tarixi ərazilərimizdə süni şəkildə hayların yerləşdirilməsi və qədim Azərbaycanın parçalanması prosesinə başlanıldı: “Bu proses ötən əsrdə də davam etdi və Qarabağın və ətraf ərazilərin də daxil olduğu iyirmi faiz torpaqlarımızın düşmənin nəzarətinə keçməsi ilə nəticələndi. Ancaq bu prosesə başı qarışan və əvvəlki itkiləri kimi müəyyən müddət bu hadisələri də əvvəlkilər kimi unudacağımıza ümid edən düşmən yanıldı. Yanıldı ki, biz xalq olaraq, əslində, heç əvvəlki xəyanətləri də, itkiləri də unutmamışıq. Əksinə, bu günə qədər verdiyimiz itkilər və bizim itkilərimiz nəticəsində onların qazandıqları bizim qan yaddaşımıza həkk olunub. İki əsrlik bir məkrli planın qarşısını almaq və bu məğlubiyyət sindromunu qırmaq üçün bizə, ilk növbədə, çox güclü milli birlik, sarsılmaz və mərkəzləşdirilmiş dövlət və məğlubedilməz ordu lazım idi. Bunun da həyata keçirilməsi üçün bütün xalqı bu istiqamətdə səfərbər edəcək qətiyyətli iradəyə sahib liderə ehtiyac var idi. Çünki biz yalnız yeni imicdə qarşımıza çıxan ermənilərə deyil, həm də onları əsrlərdir ki, özlərinin planlarına alət edən qüvvələrə qarşı mübarizəyə hazır olmalıydıq.
Xalqımızın ümummilli lideri Heydər Əliyev müstəqil Azərbaycanda siyasi hakimiyyətinin ilk illərindən siyasi, iqtisadi və beynəlxalq əlaqələr baxımından çox güclü mərkəzi idarəetmə mexanizminə malik dövlətin əsasını qoydu. Ancaq bu prosesi yekunlaşdırmaq üçün daha uzun zamana ehtiyac var idi və o prosesin daha da sürətli davamını Prezident İlham Əliyev özünün gərgin fəaliyyəti ilə gətirdi. Dövlətimizin başçısı hakimiyyətdə olduğu 18 ilin hər ilində, hər ayında, hər günündə və hər saatında belə qarşıya qoyulan hədəflərə doğru uğurla irəlilədi. Bütün bu illər ərzində dövlətimizin siyasi, iqtisadi, beynəlxalq əlaqələr və ordu quruculuğu istiqamətində yüksək inkişafını təmin etməklə yanaşı, artıq tarixə qovuşmuş Qarabağ münaqişəsi ilə bağlı sülh və danışıqlar prosesini də davam etdirdi. Paralel olaraq danışıqlar prosesini davam etdirməklə Prezident İlham Əliyev Azərbaycan xalqının çoxəsrlik sülhün, sabitliyin və mehribançılığın tərəfdarı olmaqla bağlı müsbət imicini də qorudu. Bununla biz həm də, gələcəkdə istənilən an danışıqlar prosesinə alternativ olacaq əks-hücum yolu ilə torpaqlarımızı işğaldan azad edəcəyimizlə bağlı prosesə hüquqi zəmini gücləndirdik”.
Danışıqlar prosesinin artıq dalana dirəndiyini və Ermənistan rəhbərliyinin təxribatçı bəyanatlarının bu danışıqların sonu olduğunu söyləyən X.Bəşirov bildirib ki, artıq Azərbaycanın da səbri tükəndi və Ermənistanın sentyabrın 27-də başladığı hərbi təxribata Ordumuz əks-hücum əməliyyatı ilə cavab verdi: “Azərbaycan dünyada müharibələr tarixində müddət baxımından ən qısa, məzmun və nəticə baxımından isə ən böyük müharibələrindən birini reallaşdırdı. Azərbaycan ən yeni texnologiyalar vasitəsilə həyata keçirdiyi döyüşün Qalibi adını qazandı. Müharibəyə qədər əldə etdiyimiz siyasi və diplomatik uğurlarımız nəticəsində düşməni bütün siyasi, hərbi və maddi dəstəyinə rəğmən döyüş meydanında tək qoymağımızın da bu prosesdə çox böyük rolu oldu. 44 gün ərzində düşməni çox böyük itkilərə məruz qoyub darmadağın etdik. Nəticədə Ermənistan kapitulyasiya sənədinə imza atmağa məcbur oldu. Bir sözlə, Azərbaycan mövcud imkanları olmasına baxmayaraq, 30 ilə yaxın gözləməklə, əslində, müharibənin deyil, məhz sülhün tərəfdarı olduğunu nümayiş etdirdi”.
X.Bəşirov üçtərəfli Bəyanatın Ermənistanın kapitulyasiyası olduğunu bildirərək deyib: “Düşmən təslim olmağa, ağ bayraq qaldırmağa məcbur oldu. Məhz o sənəd əsasında düşmən iyirmi gün ərzində üç böyük rayonumuzu - Ağdam, Laçın və Kəlbəcəri döyüşsüz boşaltdı. Əlbəttə ki, bu, hərbi-siyasi Zəfərimizin bariz nümunəsidir”.
Bölmənin digər xəbərləri
