Politoloq: Avropalı “siyasətçilər” sülh danışıqlarını manipulyasiya vasitəsi olaraq istifadə edirlər
Bakı, 24 oktyabr, AZƏRTAC
Avropa Parlamenti növbəti dəfə qərəzli bəyanatlar səsləndirməkdən çəkinməyərək açıq şəkildə anti-Azərbaycan mövqeyini ifadə edib. Hər zaman olduğu kimi bu dəfə də ənənəvi “insan hüquqları” mövzusu üzərindən təzyiq göstərməyə çalışan bu korrupsiyalaşmış qurum nədənsə hadisələri manipulyasiya edərək Azərbaycana təsir göstərmək və daxili işlərinə qarışmaq cəhdlərini davam etdirə biləcəyinə inanır. Ümumiyyətlə, Avropa Parlamentində keçirilən müzakirələr zamanı iş yerləri və sosial hüquqlar üzrə Avropa komissarı Nikolas Şmitin əsassız bəyanatları və qərəzli anti-Azərbaycan mövqeyi qəbuledilməzdir.
Bu fikirləri AZƏRTAC-a açıqlamasında politoloq Aytən Qurbanova söyləyib.
“Avropa Parlamentinin ənənəvi ritorikasına çevrilən bu əsassız bəyanatlar reallığı əks etdirməməklə yanaşı, həm də Azərbaycan-Avropa İttifaqı münasibətlərinə zərbə vurur. Onu da nəzərə almaq lazımdır ki, COP29 ərəfəsində Azərbaycana qarşı təşkil olunmuş qərəzli kampaniyanın tərkib hissəsi olan belə bəyanatların əsas məqsədi dövlətimizin beynəlxalq nüfuzunun hədəf alınması yolu ilə sülh danışıqlarında “güzəştli şərtlər” qazanmaqdır. Xüsusilə kollektiv Qərbin bir çox siyasi mərkəzlərinin bu kampaniyada ifrat dərəcədə fəallıq nümayiş etdirdiyini müşahidə etmək mümkündür. Mütəmadi olaraq “sülh çağırışları” edilir, natamam sülh müqaviləsinin imzalanması üçün manipulyativ bəyanatlar verilir və əslində uzun illər arxa pərdədə aparılmış anti-Azərbaycan təbliğatının uğursuzluğundan yaranmış aqressiya ifadə olunur. Diqqət ediriksə, hər fürsətdə əsassız çıxışlarını COP29 ilə əlaqələndirməyə çalışan bir şəbəkə fəaliyyət göstərir. Sanki bu mötəbər tədbir onların illərdir gözlədiyi bir fürsətə çevrilib və bütün mümkün olan və olmayan vasitələrdən istifadə edərək Azərbaycana nələrsə diktə etməyə çalışırlar. Bu, onların adət etdiyi ritorikadır, amma unutduqları əsas məqam odur ki, Azərbaycan heç kimin müstəmləkəsi deyil. Biz suverenliyimizə qarşı olan heç bir addımı güzəştə getmərik və heç kim bizimlə diktə dili ilə danışa bilməz”, - deyə A.Qurbanova əlavə edib.
Onun sözlərinə görə, insan hüquq və azadlıqlarından danışan Avropa Parlamentinin nümayəndələri bu universal dəyərləri müdafiə etdiklərini iddia edərkən niyə Avropanın tam mərkəzində baş verənləri gözardı edirlər: “İspaniyada, xüsusilə son illərdə yəhudilərin neonasizmin tərəfdarları tərəfindən təqibə məruz qalması faktı Madrid polisinə olan müraciətlər əsasında asanlıqla təsbit edilə bilər və ya 2021-ci ildə Konqo əsilli qaradərili xanımın təşəbbüsü və “Black lives matter” şüarı ilə Avropanın siyasi paytaxtı olaraq bilinən Brüssel şəhərində keçirdiyi irqçilik əleyhinə dinc aksiyanın polis zorakılığı ilə bitməsi faktı hər kəsə məlumdur. Bunlar yüzlərlə belə hadisələrdən, sadəcə, ikisidir. Həmçinin Fransanın dənizaşırı torpaqlarında, daha konkret ifadə etsək Yeni Kaledoniyada, fransız Qvineyasında və digər bölgələrdə həyata keçirtdiyi qeyri-insani addımlar niyə görülmür? Ruanda soyqırımını həyata keçirmiş Fransa və Belçika bu gün Avropanın mərkəzində sözdə insan hüquqlarından danışmaq üçün mənəvi haqqını çoxdan itirib. Nümunələr çoxdur, ancaq qərəzin və ikili standartların hökm sürdüyü qlobal sistem daxilində haqlar və hüquqlar hələ də maraqlara qurban verilməyə davam edir”.
Politoloq əlavə edib: “Digər tərəfdən avropalı “siyasətçilər” Azərbaycan ilə Ermənistan arasında davam edən sülh danışıqlarını da öz məkrli niyyətləri üçün manipulyasiya vasitəsi olaraq istifadə edirlər. Sülh göyərçini obrazını o qədər mükəmməl şəkildə imitasiya etməyi bacarırlar ki, özlərinin yazdıqları ssenarilərlə reallığı qarışdırmağa başlayıblar. Bu günə qədər Azərbaycan ərazilərinin işğal olunması faktı ilə bağlı açıq bəyanatlar verməkdən çəkinən bu riyakar “siyasətçilər” hesab edirlər ki, işğalçı ilə işğala məruz qalan tərəfi eyniləşdirməklə “ədaləti” bərpa etmək üçün səy göstərirlər. Halbuki, Qarabağı müharibəsiz işğaldan azad etmək fürsəti otuz ilə yaxın davam edən danışıqlar dövründə onlara verilmişdi. Bu şansı işğalı legitimləşdirmək üçün istifadə edib, indi sülhdən danışmaq səmimiyyətin hansı səviyyəsi olaraq dəyərləndirilə bilər?”.
Azərbaycanın müstəqil xarici siyasət gündəliyinə, qətiyyətli mövqeyə və tarixi dövlətçilik ənənələrinə sahib güclü dövlət olduğunu diqqətə çatdıran politoloq deyib: “Prezident İlham Əliyevin rəhbərliyi ilə həyata keçirilən bütün işlər və atılan bütün addımlar, ilk növbədə, milli maraqlarımızın təmin olunmasını və ərazi bütövlüyümüzün qorunmasını hədəfləyir. Eləcə də Ermənistan ilə sülh müqaviləsinin imzalanması bu prinsipial mövqeyimizin əks olunduğu bütün bəndlərin qeyd-şərtsiz qəbul ediləcəyi zaman mümkün olacaq. Kimin hansı mövqeyi ifadə etməsindən asılı olmayaraq, Azərbaycanın hədəfləri kifayət qədər açıq və konkret şəkildə bəyan edilib və dəyişməz olaraq qalır. Sürətləndirilmiş və natamam sülh müqaviləsinin imzalanmasına çalışan bütün tərəflərin yeganə hədəfi Ermənistanın “humanist və sülhpərvər” obrazını yaratmaqdır. Bu da onlara imkan verəcək ki, işğalçı Ermənistanı hərbiləşdirmək və Azərbaycanı ittiham etmək üçün özlərinə “əsas” yaratsınlar. Amma o əsasların heç birinin təsir gücünün olmayacağını da çox gözəl bilirlər”.
Bölmənin digər xəbərləri
