Politoloq: Laçın işğal dövründə ən çox “erməniləşdirilmiş” məntəqələrdən biri idi
Bakı, 29 avqust, AZƏRTAC
Dövlətimizin başçısının Laçın rayonuna növbəti səfəri bir çox məqamlarına görə iqtisadi, siyasi və sosial xarakter daşıyırdı. Birincisi, onu qeyd etmək lazımdır ki, Laçın rayonu Qarabağ iqtisadi rayonunda strateji əhəmiyyətə malik olan bir məntəqədir. Bu rayonun işğaldan azad olunması Azərbaycan diplomatiyasının böyük qələbələrindən biri kimi qəbul oluna bilər. Heç təsadüfi deyil ki, müharibədən əvvəl keçirilən görüşlərdə Ermənistan Laçının Azərbaycana qaytarılmasının əleyhinə olub. Lakin Azərbaycanın siyasi iradəsi, iqtisadi gücü və hərbi potensialı ermənilərin bu istəklərini arzu olaraq gözlərində qoydu.
Bu sözləri AZƏRTAC-a açıqlamasında politoloq Amid Əliyev söyləyib.
Onun sözlərinə görə, işğaldan sonra Laçının yenidən qurulması və inkişafı istiqamətində vacib layihələrin reallaşması əsas prioritetlərdən biri idi. Yeni hava limanının tikintisi, əhalinin geri qayıtması və enerji təminatı məsələləri bu layihələrin ən vacib bəndləri kimi qəbul edilə bilər. Dövlətimizin başçısının budəfəki səfəri məhz bu istiqamətlər üzrə aparılmış işlərlə tanışlıq və eləcə də əhalinin məskunlaşmasını yaxından izləmək məqsədi daşıyırdı.
Bu səfər, eyni zamanda, ilk dəfə idi ki, “Laçın Şəhər Günü” ilə üst-üstə düşürdü. İkinci Qarabağ müharibəsində işğaldan azad edilmiş ərazilərin adları Prezident İlham Əliyev tərəfindən əbədiləşdirilərək şəhər günləri kimi təqvimə həkk olundu. Belə ki, Prezident İlham Əliyev “Azərbaycan Respublikasının işğaldan azad edilmiş əraziləri üzrə şəhər günlərinin təsis edilməsi haqqında” Sərəncam imzaladı. Beləliklə, Laçın şəhəri erməni işğalından avqustun 26-da azad olunduğu üçün bu tarix Laçın Şəhəri Günü kimi təsdiq olundu.
“Yeni infrastruktur layihələrinin açılışı, Zabux kəndində görülmüş işlərlə tanış olması və enerji mənbələrinin istifadəyə verilməsi Prezident İlham Əliyevin budəfəki səfər zamanı diqqət çəkən məqamlar oldu. Laçının 30 illik dağıntı və talandan sonra yeni görkəm almasının şahidi oluruq. Bu, eyni zamanda, hazırda bölgədə yaşayan erməni icmasına da bir mesaj kimi qəbul olunmalıdır. Otuz il ərzində ərazidə heç bir bərpa işi aparılmadığı halda, son 9 ay ərzində Laçının görkəmi tamamilə dəyişib. Bu, Azərbaycan dövlətinin iqtisadi qüdrətinin və qurub-yaratmaq gücünün bariz nümunəsidir.
Azərbaycanlı əhalinin Laçına geri qayıtması bizim üçün olduqca vacib məqam idi. Çünki işğal altında olanda Laçın rayonu Ermənistan tərəfindən ən çox “erməniləşdirilmiş” məntəqələrdən biri idi. Suriya, Livan və digər ölkələrdən olan ermənilər məhz Laçın, Zabux və Sus kəndlərinə köçürülmüşdü. Buna cavab olaraq artıq laçınlılar öz evlərinə, torpaqlarına qayıdıblar. Ermənistan dövlətindən fərqli olaraq, bu proses zorakı məskunlaşma yox, öz dədə-baba torpaqlarına geri qayıdışdır”, - deyə A.Əliyev söyləyib.
Politoloq əlavə edib ki, Laçına səfəri zamanı rayon əhalisi qarşısında çıxış edən Prezident İlham Əliyev bir sıra siyasi məqamlara da toxundu. Belə ki, aprelin 23-də Laçında dövlət sərhədindən buraxılış məntəqəsinin qurulmasının vacib siyasi gediş olduğunu, bunun sərhəd-mühafizə işini gücləndirdiyini, həmçinin bu addımın Azərbaycanın legitim hüququna əsaslandığını bildirdi. Bu addıma qarşı çıxan erməni milliyyətçiləri və onlara havadarlıq edən xarici qüvvələrin təzyiqi fonunda Azərbaycan heç bir zaman bu məsələdə geri addım atmayıb və bundan sonra da eyni siyasi xətti davam etdirəcək. Ölkəmiz sülhün və bölgədə təhlükəsizliyin təmin olunmasının tərəfdarıdır. Bu, Azərbaycan dövlətinin prioritet siyasətidir.
Qarşıdan digər rayonların və məntəqələrin də adının əbədiləşdirildiyi tarixi günlər gəlir. Dövlətimizin başçısının həmin rayonlara səfərləri zamanı daha da vacib bəyanatların veriləcəyini indidən ehtimal etmək olar. Bu da Ermənistana və onu himayə edənlərə xəbərdarlıq xarakterli mesajlar olmalıdır.
Bölmənin digər xəbərləri
