İDMAN
POLŞA KOMANDASI ÖZ QRUPUNDA LİDERDİR
Yanvarın 7-də Bakıda voleybol üzrə olimpiya lisenziya turnirində ikinci görüşdə Almaniya və Polşa komandaları qarşılaşdılar. Turnirdəki ilk oyunlarında almanlar Azərbaycan voleybolçularına, polşalılar isə Rusiya kollektivinə qalib gəlmişdilər.
Görüşə inamla başlayan Polşa idmançıları birinci hissədə Almaniya komandasının kəskin hücumları ilə üzləşdilər. Buna baxmayaraq, birinci hissə onların qələbəsi ilə qurtardı – 25:21. İkinci hissə də gərgin mübarizə şəraitində keçdi. Polyaklar qələbəni əldən vermədilər – 29:27. Üçüncü və dördüncü hissələrdə almanlar daha yaxşı oynayaraq hesabı bərabərləşdirdilər –2:2.
Turnirdə komandalar ilk dəfə beşinci hissəni oynamalı oldular. Polşa voleybolçuları bu hissədə 16:14 hesabı ilə qalib gələrək, hələlik turnirin ən gərgin keçən bu oyununu öz xeyirlərinə başa çatdırdılar.
Beləliklə, A qrupunda Polşa yığma komandası liderdir.