Polşa Rusiya ilə neft tədarükünə dair sonuncu müqaviləni ləğv edib
Bakı, 5 aprel, AZƏRTAC
Polşanın ən böyük neft emalı şirkəti “Orlen” Rusiya Federasiyasının “Tatneft” şirkəti ilə neft tədarükünə dair son müqavilədən imtina edib.
AZƏRTAC TASS informasiya agentliyinə istinadla xəbər verir ki, bu barədə çərşənbə axşamı şirkətin rəhbəri Daniel Obaitek “Polsat” telekanalının efirində bildirib.
“Müqavilənin şərtlərində belə bir bənd var idi ki, neft müəyyən müddət ərzində tədarük olunmazsa, o zaman bizim müqaviləni ləğv etmək hüququmuz var”, - deyən Obaitek bu səbəbdən şirkətin heç bir əlavə itkiyə məruz qalmayacağını vurğulayıb.
Qeyd edək ki, “Orlen” fevralın 25-də Rusiya neftinin Drujba vasitəsilə Polşaya nəqlinin dayandırıldığını bildirib. Fevralın 27-də “Transneft”in rəsmi nümayəndəsi İqor Demin bildirib ki, şirkət hazırda Polşa istiqamətində neft daşımır. Onun sözlərinə görə, şirkət fevralın son ongünlüyündə Polşanın neft emalı zavodlarına neft vurmalı idi, lakin ödənişli marşrut sifarişləri verilməyib.
Bölmənin digər xəbərləri
