AZƏRTAC xəbər verir ki, avqustun 28-də Sumqayıtda Qarabağ müharibəsi əlilləri, şəhid ailələri və Çernobıl qəzası əlilləri üçün tikilmiş dördmərtəbəli 36 mənzilli yaşayış binası istifadəyə verilmişdir.

Azərbaycan Prezidenti İlham Əliyev mərasimdə iştirak etmişdir.

Əmək və Əhalinin Sosial Müdafiəsi Nazirliyinin sifarişi ilə tikilmiş binaya əlillərin rahat daxil olmaları üçün xüsusi giriş quraşdırılmış, hər bir mənzil mebel və digər məişət avadanlığı ilə təmin edilmişdir.

Azərbaycan Prezidentinin adından hər bir ailəyə televizor və soyuducu hədiyyə olunmuşdur.

Binaya qaz, elektrik və su xətləri çəkilmiş, bütün mənzillər telefonlaşdırılmış, mərkəzi istilik sistemi, yanğın əleyhinə xəbərdarlıq siqnalı quraşdırılmışdır.

Ətrafda abadlıq və yaşıllaşdırma işləri aparılmışdır.

Prezident İlham Əliyev yeni mənzillərin orderlərini sakinlərə təqdim etdi.

Azərbaycanın Milli Qəhrəmanı, şəhid Vasili Əliyevin həyat yoldaşı, polis mayoru AYGÜN ƏLİYEVA yeni mənzil alanlar adından dövlətimizin başçısına minnətdarlıq edərək dedi:

- Hörmətli Prezident, xoş gəlmisiniz. Cənab Prezident, icazə verin, şəhid ailələri adından, əlillər adından Sizə öz minnətdarlığımızı bildirək. 1992-ci ildə həyat yoldaşım torpaqlarımız uğrunda gedən döyüşlərdə şəhid olmuşdur, Azərbaycanın Milli Qəhrəmanıdır. Mən özüm də həyat yoldaşımla birgə döyüşmüşəm, müharibə veteranıyam. Bu gün də daxili işlər orqanlarında xidmət edirəm, polis mayoruyam.

Cənab Prezident, bizim üçün çox bir əziz gündür, sevincimizin həddi-hüdudu yoxdur. Bütün şəhid ailələri adından, müharibə veteranları adından Sizə dərin minnətdarlığımızı bildiririk. O qədər həyəcanlıyam, o qədər sevincliyəm ki, cənab Prezident, nə deyəcəyimi bilmirəm. Bu binanın xarici görünüşü də, daxili quruluşu da çox gözəldir. Cənab Prezident, biz Sizin siyasətinizə inanırıq, ulu öndərimizin davamçısısınız. 1996-cı ildə mənə ulu öndərimizlə görüşmək qismət olmuşdu. Bu gün də mənim üçün çox xoş gündür ki, onun davamçısı, gözəl siyasətçimiz - Sizinlə görüşürəm.

Prezident İLHAM ƏLİYEV yeni mənzil alanları təbrik edərək dedi:

- Sağ olun, təşəkkür edirəm. Çox sağ olun. Hamınızı təbrik edirəm. Xoşbəxt yaşayın. Həm xarici görünüşü baxımından, həm də ki, daxili təchizatı baxımından gözəl binadır. Burada çox gözəl standartlar tətbiq olunubdur. Ümumiyyətlə, son illər ərzində Azərbaycanda şəhid ailələri, Qarabağ əlilləri üçün binaların, evlərin tikintisi çox geniş vüsət almışdır. Demək olar ki, ölkəmizin hər bir yerində belə binalar tikilir və mənzillər paylanır. Siz buna layiqsiniz. Siz daha da böyük hörmətə, diqqətə layiqsiniz. Azərbaycan uğrunda, Vətən uğrunda şəhid olmuş insanların ailələri, yaralanmış, zədə almış, xəsarət almış insanlar, əlil olmuş insanlar dövlət tərəfindən maksimum dərəcədə qayğı ilə əhatə olunmalıdırlar. Biz çalışırıq bunu edək. Azərbaycan güclü sosial siyasət aparmaqla həm öz dövlət siyasətini, öz niyyətini göstərir, həm də ki, insanların həyat səviyyəsinin yaxşılaşdırılması üçün çox böyük işlər görür. Biz gələcəkdə bu siyasəti davam etdirəcəyik və ehtiyacı olan, növbədə dayanan hər bir insanın məişət problemlərinin həlli üçün çalışacağıq. Bundan sonrakı illərdə bu, daha da geniş tətbiq olunacaqdır. Çünki Azərbaycan dövlətinin iqtisadi imkanları böyüyür, möhkəmlənir, bizim dövlət büdcəmiz artır.

Əlbəttə ki, sosial məsələlərin həlli üçün bundan sonrakı illərdə daha da böyük vəsait ayrılacaqdır. Biz çalışmalıyıq ki, Azərbaycanda ehtiyac içində yaşayan insanların sayı azalsın, xüsusilə, ilk növbədə, dövlət Vətən uğrunda böyük xidmətlər göstərmiş, öz sağlamlığını itirmiş, yaxınlarını itirmiş insanlar üçün bütün tədbirləri görməlidir.

Siz Vətən uğrunda, Azərbaycanın müstəqilliyi uğrunda döyüşmüsünüz, vuruşmusunuz. Bu gün Azərbaycan müstəqil dövlət kimi uğurla inkişaf edir. Bütün problemlər öz həllini tapır və tapacaqdır. O cümlədən şübhə etmirəm ki, Ermənistan-Azərbaycan, Dağlıq Qarabağ münaqişəsinin də həlli beynəlxalq hüquq normaları və prinsipləri əsasında olacaqdır. Bunun başqa yolu yoxdur. Azərbaycan heç vaxt öz ərazi bütövlüyünü güzəştə getməyəcək, heç vaxt Dağlıq Qarabağın müstəqil olmasına imkan verməyəcəkdir.

Azərbaycanın razılığı olmadan heç vaxt Dağlıq Qarabağ müstəqil qurum kimi tanınmayacaqdır. Biz heç vaxt buna razılıq verməyəcəyik. Biz tələb edirik ki, münaqişə beynəlxalq hüquq normaları əsasında, Azərbaycanın ərazi bütövlüyü çərçivəsində həll olunsun. Azərbaycanın ərazi bütövlüyü bütün dünya tərəfindən tanınır, dəstəklənir. Bu yaxınlarda bu barədə yeni bəyanatlar səslənmişdir. Birləşmiş Millətlər Təşkilatı Təhlükəsizlik Şurasının qəbul edilmiş 4 qətnaməsində göstərilir ki, Azərbaycanın ərazi bütövlüyü toxunulmazdır və bütün işğalçı qüvvələr bizim torpaqlarımızdan qeyd-şərtsiz çıxmalıdır. Biz buna çalışırıq və danışıqların əsas mahiyyəti bundan ibarətdir.

Bir də demək istəyirəm ki, Azərbaycan öz ərazi bütövlüyünü bərpa etmək üçün bütün imkanlardan istifadə edəcəkdir. Biz həm siyasi, həm iqtisadi, diplomatik və hərbi imkanlarımızdan istifadə etmək hüququndayıq. Bu, bizim təbii hüququmuzdur və bir də demək istəyirəm ki, beynəlxalq hüquq normaları da bu hüququ bizə verir.

Azərbaycanın Prezidenti və Silahlı Qüvvələrin Ali Baş komandanı kimi mən bundan sonra da ordu quruculuğuna böyük diqqət göstərəcəyəm. Bildiyiniz kimi, son illər ərzində bu sahədə çox böyük nailiyyətlər vardır. Azərbaycan Ordusu bölgədə ən güclü ordudur və bu il keçirilmiş hərbi parad bunu bir daha göstərdi. Həm Azərbaycanı sevən insanlara, həm də Azərbaycana düşmənçilik mövqeyində dayanan qurumlara bunu göstərdik. Biz ordu quruculuğu prosesini davam etdirəcəyik. İldən-ilə artan hərbi xərclər Azərbaycan Ordusunu gücləndirir. Azərbaycan Ordusu istənilən anda öz ərazisində istənilən əməliyyatı apara bilər, heç kim bu işlərə müdaxilə edə bilməz. Bizim başqa ölkələrin torpağında gözümüz yoxdur, öz torpağımızı da heç kimə verməyəcəyik.

Əziz dostlar, bu gözəl hadisə münasibətilə mən sizi bir daha ürəkdən təbrik edirəm. Əminəm ki, siz bu gözəl evlərdə yaxşı yaşayacaqsınız, xoşbəxt yaşayacaqsınız.

X X X

Sonra Prezident İlham Əliyev mənzillərlə tanış oldu. Əmək və əhalinin sosial müdafiəsi naziri Füzuli Ələkbərov bildirdi ki, binanın tikintisinə 2007-ci ildə başlanmışdır. Mənzillərin 5-i şəhid ailələri, 29-u Qarabağ müharibəsi əlilləri, 2-si isə Çernobıl qəzası əlilləri üçün ayrılmışdır.

Dövlətimizin başçısı yeni mənzillərin sakinlərini bir daha təbrik etdi, ən xoş arzularını bildirdi.

######