Bakı, 23 dekabr, AZƏRTAC 

2020-ci ilin Azərbaycan tarixinə qızıl hərflərlə yazılacağı indi nə tarixçilərdə, nə də sadə vətəndaşlarda şübhə doğurur. Azərbaycan bu il, sözün həqiqi mənasında, gələcək nəsillərin də qürurla xatırlayacağı böyük bir Qələbəyə imza atdı. 44 gün davam edən Vətən müharibəsi ölkənin ərazi bütövlüyünü təmin etməklə yanaşı, həm də regionda qüvvələr balansının yeni konfiqurasiyasını formalaşdırdı. Azərbaycan Ermənistanın 30 il davam edən işğalına son qoymaqla, Cənubi Qafqazda əsl söz sahibinin kim olduğunu bir daha dünyaya nümayiş etdirdi. Heç şübhəsiz ki, bu tarixi Qələbənin əsas müəllifi ümummilli lider Heydər Əliyevin siyasətini uğurla davam etdirərək qısa müddətdə güclü dövlət və qüdrətli ordu yaratmağa müvəffəq olmuş Azərbaycan Respublikasının Prezidenti İlham Əliyevdir.

Bu sözləri AZƏRTAC-a Milli Məclisin deputatı, YAP Siyasi Şurasının üzvü Ramin Məmmədov deyib.

Deputat bildirib ki, Prezident İlham Əliyevin ölkəyə rəhbərlik etdiyi 17 ilin demək olar bütün mərhələlərində ən əsas məsələ Azərbaycan xalqının milli hədəfi kimi ictimai şüurda özünə kök salmış ərazi bütövlüyünün təmin olunması idi. Cənab İlham Əliyev hakimiyyətə gəldiyi ilk gündən dövlətin çoxşaxəli fəaliyyətini bu müqəddəs vəzifənin uğurla həyata keçirilməsi üçün zəruri şərtlərin təmin olunması istiqamətində qurmağa nail oldu.

Azərbaycanda iqtisadi və sosial sahədə aparılan ardıcıl, sistemli islahatlar qısa müddət ərzində ölkənin iqtisadi imkanlarının xeyli dərəcədə genişləndirilməsinə, uğurlu sosial dövlət modelinin qurulmasına imkan yaratdı. Bu günlərdə "Doing Business” hesabatında müəyyən edilən indikatorlar üzrə Azərbaycanın mövqelərinin əhəmiyyətli dərəcədə yüksəlməsi və 190 ölkə arasında qabaqcıl yerlərdə qərarlaşması bu islahatların kifayət qədər düşünülmüş strategiyaya əsaslandığının daha bir sübutu kimi qiymətləndirilə bilər. Dünya Bankının daxili auditi tərəfindən aparılmış müstəqil araşdırmanın nəticəsinə əsasən, Azərbaycanın "Doing Business 2020” hesabatında mövqeyi 6 pillə yaxşılaşıb və ölkəmiz bir daha dünyanın ən islahatçı 10 ölkəsi sırasına daxil olub. İslahatların "Elektrik təchizatı şəbəkələrinə qoşulma”, "Müqavilələrin icrası” və "Sərhəddə ticarət” indikatorları üzrə "Doing Business 2020” hesabatında lazımınca qiymətləndirilmədiyi və ya daha az balla qiymətləndirildiyi məlum olub. Düzəlişlərdən sonra isə "Doing Business 2020” hesabatında Azərbaycanın əldə etdiyi bal 76,7-dən 78,5-ə qədər artırılıb. Bununla da Azərbaycanın qlobal reytinq sıralamasında mövqeyi 191 ölkə arasında 34-dən 28-ə yüksəlib. Bu mövqe irəliləməsi nəticəsində Azərbaycan Dünya Bankı tərəfindən yenidən dünyanın ən islahatçı on ölkəsindən biri kimi qiymətləndirilib.

Ötən müddətdə Azərbaycan Şərq-Qərb, Şimal-Cənub və Şimal-Qərb nəqliyyat dəhlizləri qlobal əhəmiyyətli layihələrdə fəal iştirak etməklə Avrasiyanın mühüm və etibarlı nəqliyyat-logistika mərkəzlərindən biri kimi özünü təsdiq edib. Dünya İqtisadi Forumunun 2019-cu il üçün dərc etdiyi Qlobal Rəqabətlilik İndeksinə görə Azərbaycan dəmir yolu xidmətlərinin səmərəliliyinə görə 141 ölkə arasında 11-ci, hava nəqliyyatı xidmətləri üzrə 12-ci, dəniz limanı xidmətləri üzrə 25-ci, yol infrastrukturunun keyfiyyətinə görə isə 27-ci yerdə qərarlaşmışdı.

Ölkənin enerji resurslarının səmərəli istifadəsi, iqtisadi azadlıqların təmin olunması, kölgə iqtisadiyyatı ilə mübarizə və digər sahələrdə əldə olunmuş uğurlar makroiqtisadi göstəricilərin əhəmiyyətli dərəcədə yaxşılaşdırılmasına imkan yaratmışdı. Azərbaycan indi iqtisadi baxımdan regionun ən güclü dövləti kimi bütün dünya tərəfindən qəbul olunur.

Azərbaycanda həyata keçirilən sosial islahatlar isə dövlətin iqtisadi potensialını nümayiş etdirməklə yanaşı, həm də güclü vətəndaş, mütəşəkkil cəmiyyətin formalaşdırılmasını hədəfləyən strateji baxışın nəticəsidir. COVID-19 pandemiyasının yaratdığı yeni və son dərəcə mürəkkəb reallıqlarda belə dövlət tərəfindən vətəndaşların sosial müdafiəsinin təmin olunmasına yönəlmiş islahatlar kompleksinin davam etdirilməsi dövlətlə cəmiyyət arasında qarşılıqlı etimadın daha da möhkəmləndirilməsinə yeni stimul verdi. Sosial islahatlar əhalinin aztəminatlı hissəsindən tutmuş fiziki məhdudiyyətli şəxslərə, müharibə əlillərinə və veteranlarına, məcburi köçkünlərə, şəhid ailələrinə, eləcə də bu kateqoriyadan olan digər təbəqələrə qədər böyük bir qrupu əhatə edirdi. Bu tədbirlərin ən əsas məqsədinin insanların rifahını yaxşılaşdırmaqdan ibarət olduğu sözsüzdür, lakin bu, nəticə etibarilə həm də dövlətin gücünü artıran islahatlar konsepsiyası kimi səciyyələndirilməlidir. Çünki güclü vətəndaş elə güclü dövlət deməkdir. Başqa sözlə desək, vətəndaşı güclü olmayan dövlət özü güclü ola bilməz. Azərbaycanda aparılan sosial islahatların fəlsəfəsi də elə bundan ibarət idi.

Azərbaycanın ötən dövrdə həyata keçirdiyi xarici siyasət kursunun da başlıca hədəfi Ermənistan-Azərbaycan Dağlı Qarabağ münaqişəsinin ədalətli, beynəlxalq hüquqa əsaslana, tarixi reallığa istinad edən həllinə nail olmaqdan ibarət olmuşdu. Bu məqsədlə Azərbaycan dövləti bütün beynəlxalq platformalarda sistemli iş aparırdı. Məhz görülən ardıcıl işlərin nəticəsi olaraq Ermənistanın Azərbaycan torpaqlarını işğal etməsi faktını bütün dünyanı inandırmağa nail olundu. Azərbaycanın bir sıra beynəlxalq təşkilatlarla uğurlu əməkdaşlığı geosiyasi proseslərə təsir imkanlarının artmasında mühüm rol oynayırdı. Qoşulmama Hərəkatına sədrlik, BMT BMT-nin Təhlükəsizlik Şurasına qeyri-daimi üzv seçilməsi və bir sıra digər nüfuzlu beynəlxalq təşkilatlar çərçivəsində həyata keçirilən fəaliyyət Azərbaycanın nüfuzunun artmasına böyük töhfələr verdi. Torpaqlarının 20 faizi işğal altında olan bir ölkə üçün, beynəlxalq platformalarda diplomatik fəaliyyətin uğurlu təşkili son dərəcə mühüm əhəmiyyətə malik idi. 2020-ci ilin payızında - Vətən Müharibəsinin davam etdiyi günlərdə biz bunun bir daha şahidi olduq.

Heç şübhəsiz ki, iqtisadi imkanların artması ordu quruculuğu sahəsində də həyata keçirilən islahatların uğurla nəticələnməsini şərtləndirən əsas amillərdən biri kimi çıxış edir. Məhz Prezident İlham Əliyevin apardığı uğurlu siyasət nəticəsində Azərbaycan ordusunun müasir döyüş standartlarına uyğun modernləşməsi həyata keçirildi. Müasir artilleriya qurğuları, reaktiv yaylım atəşi sistemləri, toplar, taktiki raket və zenit-raket kompleksləri, pilotsuz uçuş aparatlarının Azərbaycanda qoşun növlərinin silahlanmasında yer alması ordunun imkanlarını əhəmiyyətli dərəcədə artırdı.

Bu gün Azərbaycan vətəndaşı yeni bir reallıqda yaşayır. O, güclü orduya, beynəlxalq aləmdə layiq olduğu siyasi nüfuza, dayanıqlı iqtisadiyyata sahib qalib ölkənin vətəndaşıdır. Bu reallığı yaratmaq üçün Azərbaycan uzun, bəzi məqamlarda çətin yol keçməli oldu. Lakin məhz Prezident İlham Əliyevin liderliyi, müdrikliyi, uzaqgörənliyi, tarixi prosesləri düzgün qiymətləndirmək bacarığı bütün çətin vəzifələrin öhdəsindən uğurla gəlməyə imkan yaratdı. Azərbaycan Silahlı Qüvvələrinin Müzəffər Ali Baş Komandanının rəhbərliyi altında Azərbaycan xalqı yeni bir tarix yazdı. Bu tarixdə dünyanın harasında yaşamasından, sosial statusundan, dünyagörüşündən asılı olmayaraq hər bir vətənpərvər azərbaycanlının imzası var. Çünki məhz xalqımızın birliyi, həmrəyliyi, öz liderinə sonsuz inamı bizim qələbələrimizin qayəsini təşkil edir. Bu inamı, bu birliyi yaradansa cənab İlham Əliyevdir. Azərbaycan Prezidentinin "Nəyi necə, nə vaxt etmək lazımdır, bunu mən bilirəm" sözləri bu gün milyonlarla azərbaycanlının inamının başlıca mənbəyidir.