QAFQAZ MÜSƏLMANLARI İDARƏSİ SƏDRİNİN TƏKLİFİ MÖTƏBƏR İSTANBUL KONFRANSININ İŞTİRAKÇILARINDA BÖYÜK MARAQ DOĞURMUŞDUR
Bu mötəbər konfransa bir çox ölkələrin tanınmış din xadimləri qatılmışlar. Qafqaz regionunu Seyxülislam Allahşükür Paşazadə təmsil edir. Konfransın ünvanına BMT-nin Baş katibi Kofi Annan, ABŞ Prezidenti Corc Buş, Roma papası XVI Benediktin adından təbrik məktubları daxil olmuşdur.
Qafqaz Müsəlmanları İdarəsinin sədri böyük diqqət və marağa səbəb olmuş çıxışında regiondakı həqiqətləri konfrans iştirakçılarının diqqətinə çatdırmış, Azərbaycanın tolerantlıq sahəsində qazandığı nailiyyətlərdən danışmışdır. Şeyxülislam A.Paşazadə, həmçinin xatırlatmışdır ki, 11 il bundan əvvəl, məhz bu zalda “Sülh və dözümlülük” mövzusunda keçirilmiş konfrans zamanı Azərbaycan xalqının ümummilli lideri, Türk dünyasının böyük oğlu Heydər Əliyev tədbir iştirakçıları ilə görüşərək, onların sülhməramlı fəaliyyətlərinə xeyir-dua vermişdi. Bu dəfə isə Şeyxülislam ulu öndər Heydər Əliyevin siyasi xəttinin layiqli davamçısı Prezident İlham Əliyevin səmimi salamlarını və xoş arzularını konfrans iştirakçılarına yetirmişdir.
Şeyxülislamın çıxışındakı maraqlı bir təklif konfrans iştirakçıları tərəfindən böyük maraqla qarşılanmışdır. Qafqaz Müsəlmanları İdarəsinin rəhbəri, Birləşmiş Millətlər Təşkilatının himayəsi altında məşvərətçi statusda bir qurumun – Dünya Xalqlarının Ali Dini Şurasının yaradılması təşəbbüsünü irəli sürmüşdür. Bu şura zorakılığa, təcavüzə, münaqişələrə bəraət qazandırmaq üçün müqəddəs rəmzlərdən, ilahi mətnlərdən istifadə etmək istəyənlərin mənfur məqsədlərini ifşa edər, müxtəlif dinlərə mənsub insanlar arasında qarşılıqlı dözümlülük ruhunun bərqərar olunması sahəsində mühüm işlər görə bilər.
Konfransda iştirak edən görkəmli din xadimləri, İslamşünas alimlər Allahşükür Paşazadəni Şeyxülislamlıq fəaliyyətinin 25 illiyi münasibətilə təbrik etmiş, ona gələcək fəaliyyətində nailiyyətlər arzulamışlar.
Konfrans öz işini noyabrın 9-da başa çatdıracaqdır.
