“QALA” BASKETBOL KLUBU AVROPA KUBOKUNUN NÖVBƏTİ MƏRHƏLƏSİNƏ ÇIXMIŞDIR
Azərbaycan çempionu, indiki respublika birinciliyinin lideri “Qala” basketbol klubu bir oyun belə keçirmədən Avropa Kubokunun növbəti mərhələsinə çıxmışdır. Gənçlər, İdman və Turizm Nazirliyinin mətbuat xidmətindən AZƏRTAC-ın müxbirinə verilən xəbərə görə, bu, Azərbaycan komandasının yarımqrup üzrə rəqibləri - Gürcüstanın”Dinamo” və Rusiyanın “Rostov” klublarının turnirdə iştirakdan imtina etməsindən sonra məlum olmuşdur. Rimas Kurtinaytisin yetirmələrinin növbəti mərhələdə rəqibi Ukraynanın “Sumximprom” komandası olacaqdır. “Qala” birinci görüşü noyabrın 28-də rəqib meydançasında keçirəcək, dekabrın əvvəlində isə “Sumximprom”u Bakıda qəbul edəcəkdir.
Komandamız bu oyunlara hazırlıq çərçivəsində noyabrın 17-dən Türkiyədə yerli “Maltepe”, “İşıqspor”, “Qalatasaray” və “Tekelspor” klubları ilə yoldaşlıq görüşləri keçirir.
Bölmənin digər xəbərləri
