Qarabağ Bəyannaməsi Türkdilli dövlətlərin əlaqələrinin gücləndirilməsi üçün yol xəritəsidir ŞƏRH
Bakı, 11 iyul, AZƏRTAC
Azərbaycan müxtəlif mədəniyyətlər və sivilizasiyalar arasında dialoqa dair önəmli tədbirlər keçirilməsi üçün əlverişli məkandır. Bu tədbirlər ölkəmizin nüfuzunun yüksəldilməsi və beynəlxalq proseslərdə əhəmiyyətinin artmasına, eləcə də, Azərbaycanın qitələrarası və sivilizasiyalararası əməkdaşlıq məsələlərinə töhfə verir. Azərbaycanın ərazi bütövlüyünün və suverenliyinin tam bərpasından sonra Şuşada keçirilən Zirvə görüşü Türk dövlətlərinin birliyinin, onların sülhə və ədalətə sadiqliyinin bariz təzahürüdür. Türk Dövlətləri Təşkilatının qeyri-rəsmi Zirvə görüşünün mədəniyyət paytaxtımız qədim Şuşa şəhərində keçirilməsinin rəmzi mənası var.
Bu fikirləri AZƏRTAC-a açıqlamasında Yeni Azərbaycan Partiyası Nəsimi rayon təşkilatının sədri Azər Süleymanov deyib.
O bildirib ki, mədəniyyətlərin qovuşduğu tolerantlıq məkanı olan Azərbaycanda hökm sürən sabitlik, əmin-amanlıq, təhlükəsizlik dünya ictimaiyyətinin nümayəndələrinin bir araya gəlməsində, dialoq və əməkdaşlığın inkişafında müstəsna rola malikdir.
“Azərbaycanın xarici siyasətinin prioritet istiqamətlərindən birini Türk dövlətləri ilə əlaqələrin genişləndirilməsi, Türk Dövlətləri Təşkilatının gücləndirilməsi təşkil edir. Türk Dövlətləri Təşkilatının ildə bir dəfə qeyri-rəsmi Zirvə görüşünün keçirilməsi məhz Azərbaycanın təşəbbüsüdür. Azərbaycan Türk dövlətlərinin vahid platformada birləşməsinə, bu ölkələr arasında siyasi, iqtisadi, mədəni və digər sahələrdə əməkdaşlığın yüksələn xətlə inkişafına xüsusi önəm verir. Prezident İlham Əliyev Türk dünyasının birliyi, həmrəyliyi naminə TDT-nin vahid ruhunun gücləndirilməsində qətiyyətli liderlik nümayiş etdirir. Türk dövlətlərinin siyasi fəallığı hazırkı məqamda çox mühümdür və türkdilli ölkələrin liderlərinin bir araya gəlməsi hərtərəfli əməkdaşlığın genişləndirilməsində mühüm rola malikdir. Vurğulanmalıdır ki, türkdilli dövlətlərlə Azərbaycan arasında səmərəli, etibarlı siyasi dialoq qurulub, bütün sahələrdə hərtərəfli əməkdaşlığın daha da inkişaf etdirilməsi istiqamətində ardıcıl tədbirlər görülür. Prezident İlham Əliyevin vurğuladığı kimi, TDT bizim üçün əsas beynəlxalq təşkilatdır, bizim ailəmiz Türk dünyasıdır”, - deyə YAP Nəsimi rayon təşkilatının sədri qeyd edib.
A.Süleymanov bildirib ki, Türk Dövlətləri Təşkilatının dövlət başçılarının qeyri-rəsmi Zirvə görüşü çərçivəsində Qarabağ Bəyannaməsinin imzalanması çox mühüm hadisədir və gələcək üçün yol xəritəsidir. Bəyannamənin bəndləri TDT-nin gələcək Zirvə görüşlərində nəzərə alınacaq və əsas götürüləcək. Bəyannamədə qeyd olunduğu kimi, Türk dünyası regionda və dünyada sülh, təhlükəsizlik, sabitlik, inkişaf və tərəqqi ideyalarına sadiq olan türk xalqlarının ortaq etnik köklər, tarix, dil, mədəniyyət, ənənələr və dəyərlərinə söykənən ailədir. Türk dövlətlərinin regionda və dünyada qlobal ticarətin və iqtisadiyyatın inkişafında əvəzsiz rolu nəzərə alınmaqla, müvafiq nəqliyyat infrastrukturunun və səmərəli transregional dəhlizlərin yaradılması yolu ilə Türk dövlətləri arasında bağlılığın daha da inkişaf etdirilməsinin vacibliyi Bəyannamədə vurğulanır.
Azərbaycanın Türk dünyası ölkələri ilə əlaqələrinin yüksələn xətlə inkişaf etdiyini qeyd edən YAP Nəsimi rayon təşkilatının sədri TDT-nin siyasi, iqtisadi, mədəni sahələrdə, təhlükəsizliyin təmin edilməsi istiqamətində birgə fəaliyyət göstərməsini günün tələbi kimi dəyərləndirib.
“Prezident İlham Əliyev qeyri-rəsmi Zirvə görüşündəki çıxışında Türk dövlətlərinin birliyinin daha da güclənməsinin önəmini diqqətə çatdırdı. Şərq-Qərb nəqliyyat dəhlizinin genişləndirilməsinin vacibliyini vurğulayan dövlətimizin başçısı, Bakı-Tbilisi-Qars dəmir yolunun illik yükaşırma qabiliyyətinin Azərbaycanın əlavə sərmayəsi nəticəsində artırıldığını diqqətə çatdırdı. Vurğulamaq yerinə düşər ki, Azərbaycanın iqtisadi inkişafı regionda həyata keçirilən transmilli layihələrin uğurla reallaşmasına gətirib çıxarıb. Xəzər dənizində 50-dən çox ticarət gəmisi olan Azərbaycan Türk dövlətləri üçün önəmli tranzit xidmətləri göstərir. Hazırda Bakı gəmiqayırma zavodunda 6 gəmi inşa edilir və gələn il ölkəmizin 9-cu Beynəlxalq Hava Limanı Laçında istismara veriləcək”, - deyə A.Süleymanov əlavə edib.
Bölmənin digər xəbərləri
