QAX GƏNCLƏRİNİN V TOPLANTISI KEÇİRİLMİŞDİR
AZƏRTAC xəbər verir ki, Azərbaycan Gənclərinin V Forumuna hazırlıq çərçivəsində iyunun 25-də Qaxda rayon gənclərinin V toplantısı keçirilmişdir.
Tədbirdə Qax rayon gənclər və idman idarəsinin rəisi Əlövsət Bayramovun Gənclərin IV Forumundan ötən dövr ərzində görülən işlər və qarşıda duran vəzifələr barədə hesabat məruzəsi dinlənilmişdir. Natiq 1996-cı ildən başlayaraq, hər 3 ildən bir keçirilən bu tədbirləri respublikamızın ictimai-siyasi həyatında mühüm hadisə kimi dəyərləndirmiş, mahiyyətcə bir-birindən fərqlənən bu forumların böyük əhəmiyyət daşıdığını bildirmişdir. Məruzədə xüsusi vurğulanmışdır ki, bu gün Azərbaycan gəncliyi ümummilli liderimiz Heydər Əliyevin Gənclərin I Forumunda dediyi: “Cəncliyin inkişafı-cəmiyyətimizin inkişafıdır. Hər bir gənc Azərbaycanın müstəqil gələcəyini təmin etmək üçün Vətəni, ölkəni, torpağı, xalqımızı, millətimizi, dinimizi, dilimizi, milli ənənələrimizi sevməlidir” fikirlərini əsas tutaraq, respublikanın ictimai-siyasi həyatında fəal iştirak edir, cəmiyyətin ən aparıcı qüvvəsinə çevrilir.
Natiq bildirmişdir ki, Azərbaycan gənclərinin IV Forumundan ötən dövr ərzində respublikada aparılan sosial-iqtisadi islahatlar, yeni iş yerlərinin yaradılması, əhalinin, xüsusilə gənclərin məşğulluğunun təmin edilməsi sahəsində həyata keçirilən tədbirlər bir daha sübut edir ki, Azərbaycanın gələcəyi etibarlı əllərdədir. Qazanılan uğurlarda şübhəsiz ki, gənclərin böyük rolu və payı vardır.
Rayon gənclərinin qazandığı uğurlar barədə məlumat verən idarə rəisi gənclərlə aparılan işin səmərəliliyini artırmaq məqsədilə son dövrlər “Yaradıcı gənclər”, “Hərbi vətənpərvərlik tərbiyəsi”, “Səadət” qızlar klubu və s. yaradıldığını, “Breyn-rinq” intellektual oyunu, “İstedadlar sorağında” devizi altında ümumrayon baxış-müsabiqələrinin, idman yarışlarının keçirildiyini, bu tədbirlərdə minlərlə gəncin iştirak etdiyini nəzərə çatdırmışdır.
Toplantıda çıxş edən gənclər ümummilli liderimiz Heydər Əliyevin ideya və arzularının gerçəkləşməsi üçün bundan sonra da bütün qüvvə və bacarıqlarını əsirgəməyəcəklərini bildirmiş, Azərbaycanı dünyanın ən inkişaf etmiş ölkələrdən birinə çevirmək uğrundakı yorulmaz fəaliyyətində Prezident İlham Əliyevin ən yaxın köməkçiləri olacaqlarını, payızda keçiriləcək növbəti prezident seçkilərində birmənalı şəkildə ona səs verəcəklərini xüsusi vurğulamışlar.
Toplantıda Gənclər və İdman Nazirliyinin məsul işçisi Zöhrə Əsgərova, Qax Rayon İcra Hakimiyyəti başçısının müavini Ziyafət Xasıyeva çıxış edərək rayon gənclərinə gələcək fəaliyyətlərində uğurlar arzulamışlar.
Tədbirdə Azərbaycan Gənclərinin V Forumuna 15 nəfərdən ibarət nümayəndə heyəti seçilmişdir.
İştirakçılar adından Prezident İlham Əliyevə müraciət qəbul olunmuşdur.
Tədbir gənc ifaçıların maraqlı konsert proqramı ilə başa çatmışdır.
Bölmənin digər xəbərləri
