Qazaxıstan regional qaz kəmərinin tikintisində iştirak etmək niyyətindədir
Astana, 22 oktyabr, AZƏRTAC
Qazaxıstan hökuməti Türkmənistan-Əfqanıstan-Pakistan-Hindistan qaz kəmərinin tikintisində iştirak etməkdə maraqlı olduğunu bildirib.
AZƏRTAC xəbər verir ki, bunu Qazaxıstan Respublikasının energetika nazirinin müavini Erlan Akkenjenov Almatıda keçirilən Qazaxıstan-Əfqanıstan biznes forumunda çıxışı zamanı deyib.
Nazir müavininin sözlərinə görə, hazırda Qazaxıstanın bu infrastruktur layihəsində mümkün iştirakı ilə bağlı Türkmənistan tərəfi ilə danışıqlar aparılır.
Bu qaz kəmərinin ümumi uzunluğu 1814 kilometrdir. Marşrut Türkmənistandan - 214 kilometr, Əfqanıstandan - 774 kilometr, Pakistandan - Hindistanla sərhədə qədər - 826 kilometr olmaqla dörd dövlətin ərazisindən keçir.
2015-ci ilin dekabrında tikintisinə başlanılan qaz kəmərinin Türkmənistan hissəsində işlər başa çatıb. Əfqanıstan bölməsində tikinti işləri 2018-ci il fevralın 23-də başlayıb. Bu boru xətti ilə ildə 33 milyard kubmetrə qədər təbii qaz nəql olunacaq.
Layihənin ilkin dəyəri 10 milyard ABŞ dolları məbləğində qiymətləndirilir.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
