Qazaxıstan və Özbəkistan 10 illik strateji tərəfdaşlıq və müttəfiqlik proqramını təsdiq edir
Astana, 8 avqust, AZƏRTAC
Qazaxıstan Prezidenti Kasım-Jomart Tokayev onun ölkəsi ilə Özbəkistan arasında qarşılıqlı ticarət dövriyyəsini tez bir zamanda 5 milyard dollara çatdırmağı və yaxın gələcəkdə bu rəqəmi iki dəfə artırmağı mümkün hesab edir.
AZƏRTAC Akordanın mətbuat xidmətinə istinadla xəbər verir ki, bu barədə dövlət başçısı özbəkistanlı həmkarı Şavkat Mirziyoyev ilə danışıqlar əsnasında məlumat verib.
Prezidentlər Qazaxıstan və Özbəkistanın Ali Dövlətlərarası Şurasının birinci iclasında iştirak ediblər.
Tədbir zamanı iki ölkə arasında iqtisadi-ticarət, nəqliyyat-tranzit, su təsərrüfatı və enerji, mədəni-humanitar sahələrdə əməkdaşlığın genişləndirilməsi üzrə əsas istiqamətlər müzakirə olunub.
“Bu gün bizim ümumi dəyəri 3 milyard dollardan çox olan 70-ə yaxın birgə layihəmiz var ki, bu da 14 mindən çox iş yerinin yaradılmasını nəzərdə tutur. Bu istiqamətdə əməkdaşlığı daha da dərinləşdirməyə və biznes üçün rahat şərait yaratmağa hazırıq”, -deyə Qazaxıstan Prezidenti vurğulayıb.
O xatırladıb ki, ötən il iki ölkə müttəfiqlik münasibətləri haqqında tarixi Müqavilə imzalayıb: “Bu gün biz növbəti 10 il üçün Strateji Tərəfdaşlıq və Müttəfiqlik Proqramını təsdiq edirik. Əminəm ki, bu mühüm sənədlər iki respublika arasında əlaqələrin inkişafına yeni təkan verəcək”.
Kasım-Jomart Tokayev unikal tranzit və nəqliyyat imkanlarından maksimum səmərəli istifadə etməyi zəruri hesab edir.
Dövlət başçısı tariflərin optimallaşdırılması, inzibati prosedurların sadələşdirilməsi və yüklərin çatdırılma müddətinin azaldılması üzrə tədbirlərin birgə işlənib hazırlanmasını mühüm vəzifə adlandırıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
