Astana, 9 noyabr, AZƏRTAC

Azərbaycanda Zəfər Gününün ildönümünün qeyd edildiyi günlərdə Qazaxıstan Respublikası Parlamenti Məclisinin Beynəlxalq məsələlər, müdafiə və təhlükəsizlik komitəsinin sədri Ayqul Kuspan ilə söhbətləşdik.

O, AZƏRTAC-a eksklüziv müsahibəsində ikitərəfli əməkdaşlığın perspektivləri ilə bağlı fikirlərini bölüşüb, Azərbaycanın ərazi bütövlüyünün bərpasının Türk dünyası üçün əhəmiyyətini qiymətləndirib və işğaldan azad edilmiş Qarabağa səfər təəssüratlarından danışıb.

- Azərbaycanın 44 günlük müharibədə Qələbəsinin Türk dünyası üçün tarixi əhəmiyyəti nədən ibarətdir?

-Azərbaycanın Qələbəsi və Qarabağ üzərində suverenliyinin bərpası əlaqələrimizə yeni çalar verir. Bu, bütün Türk dünyası üçün mühüm hadisədir. Bu Qələbə, bütün türk birliyi üçün önəmlidir və ilham mənbəyidir.

- Ölkələrimizin liderləri arasında münasibətləri necə xarakterizə edərdiniz?

- Dövlət başçılarımız arasında konstruktiv və etibarlı münasibətlər yaranıb. Hər iki Prezident təcrübəli diplomatdır, dünyada gedən prosesləri dərindən dərk edir və vəziyyəti düzgün qiymətləndirmək bacarığına malikdir.

Hər iki lider öz ölkələrinin əsl vətənpərvərləridir. Eyni nəslin və oxşar siyasi formasiyanın nümayəndələri olduqları üçün ortaq baxış və dəyərləri bölüşürlər. Onların konstruktiv şəxsi münasibətləri ikitərəfli əməkdaşlığımızın daha da inkişafı və dərinləşməsi üçün möhkəm zəmin rolunu oynayır.

- Parlamentlərarası əməkdaşlığın inkişaf perspektivləri necədir?

-Münasibətlərimiz yüksələn xətt üzrə sabit və ardıcıl inkişaf edəcək. Ölkələrimiz arasında parlamentlərarası əməkdaşlığın yüksək səviyyəsini xüsusi qeyd etmək lazımdır.

Ölkənizdə keçirilən parlament seçkilərini və onun nəticələrini müsbət qarşılayırıq. Biz parlamentlərarası əməkdaşlığı davam etdirmək və gücləndirmək niyyətindəyik.

Biz həm ikitərəfli, həm də müxtəlif təşkilatlar çərçivəsində səmərəli əməkdaşlıq edəcəyik. Bu, hər şeydən əvvəl, bizim çox sıx qarşılıqlı əlaqədə olduğumuz TÜRKPA, ATƏT Parlament Assambleyası, Parlamentlərarası Birlik və digər təşkilatlardır.

- Qarabağın qaytarılmasının bütövlükdə region üçün əhəmiyyətini necə qiymətləndirirsiniz?

-Mən Qarabağın Azərbaycana qaytarılmasını və bu ərazilər üzərində suverenliyin bərpasını bütün regionun inkişafında yeni mərhələnin başlanğıcı hesab edirəm. Regionun potensialını açmaq və davamlı sülhü təmin etmək vacibdir. Bu, xüsusilə indiki qeyri-sabit dünyada doğru addımlardır, eyni zamanda, təkcə Azərbaycan üçün deyil, bütün Türk dünyası üçün vacibdir.

- Siz işğaldan azad ediləndən sonra Qarabağda olmusunuz. Bu səfərdən hansı təəssüratlarınız var?

-2021-ci ilin sentyabrında mən Qarabağda və Şuşa şəhərində oldum, burada müharibə başa çatdıqdan dərhal sonra Azərbaycanın başladığı genişmiqyaslı bərpa işlərini şəxsən müşahidə etdim. Füzulidə yeni Beynəlxalq Hava Limanı məndə xüsusi təəssürat doğurdu.

Həmin dövrdə Şuşada artıq İncəsənət Qalereyası və bir sıra digər mədəniyyət obyektləri istifadəyə verilmişdi ki, bu da Azərbaycanın bu tarixi şəhərə, onun zəngin mədəni irsinə qayğıkeş, doğma münasibətini əyani şəkildə nümayiş etdirir.

- Azərbaycanın işğaldan azad edilmiş ərazilərin bərpasına yanaşmasını necə xarakterizə edərdiniz?

-Bu, sevimli övladın ailəyə qayıtmasına bənzəyir, qohumlar onu qayğı ilə əhatə etməyə, onun yaxşı və firavan yaşaması üçün hər cür şərait yaratmağa çalışırlar. Məhz bu hörmətli münasibətlə Azərbaycan Qarabağın dirçəlişinə başladı.

Paralel olaraq, ərazilərin minalardan təmizlənməsi, infrastruktur obyektlərinin - mehmanxanaların, muzeylərin, yolların salınması istiqamətində genişmiqyaslı işlər aparılıb. Ən qısa müddətdə tikilmiş Zəfər yolu məni heyran etdi. Aparılan bərpa işlərinin tempi və miqyası heyrətamizdir.

- Son illər regionda baş verən dəyişiklikləri necə qiymətləndirirsiniz?

- Qarabağın bərpasına belə diqqətli münasibət onun Azərbaycanla qırılmaz bağlılığını əyani şəkildə nümayiş etdirir.

Regiona səfərimdən üç il keçir və mən çox istərdim ki, bir daha bu yerlərə baş çəkim və baş verən dəyişiklikləri görüm. İşğaldan sonrakı ilk aylarda həyata keçirilən islahatların miqyasını nəzərə alsaq, əminəm ki, Qarabağ bu gün əsl çiçəklənmə dövrünü yaşayır. Bu regionun daha da çiçəklənməsini ürəkdən arzulayıram.