Qazaxıstanlı deputat: Prezident İlham Əliyevin səfəri Qazaxıstan–Azərbaycan əməkdaşlığına güclü təkan verəcək
Bakı, 20 oktyabr, Pərvanə Qafarova, AZƏRTAC
İki dost ölkənin liderlərinin – Kasım-Jomart Tokayev və İlham Əliyevin səyləri sayəsində Qazaxıstan və Azərbaycan arasında ikitərəfli münasibətlər dinamik şəkildə inkişaf edir. Bu il qarşılıqlı ticarət dövriyyəsi 547 milyon ABŞ dollarına çatıb ki, bu da 2–3 il əvvəllə müqayisədə 2,5 dəfə çoxdur. Nizamnamə kapitalı 300 milyon ABŞ dolları olan Birgə İnvestisiya Fondu yaradılıb.
Bu barədə AZƏRTAC-a Qazaxıstan Respublikası Parlamenti Məclisinin (aşağı palata) deputatı Erlan Sairov məlumat verib.
Agentliyin həmsöhbəti bildirib ki, Astana Azərbaycan Respublikasının Qarabağ bölgəsinin bərpasına dəstək göstərir. O xatırladıb ki, Qazaxıstan Füzuli şəhərində Kurmanqazı adına Uşaq Yaradıcılıq Mərkəzi inşa edib.
“İki ölkə arasında ticarət dövriyyəsi artmaqda davam edir, humanitar əməkdaşlıq da genişlənir. Buna görə də Azərbaycan Prezidenti İlham Əliyevin Qazaxıstana səfəri dövlətlərimiz arasında sosial-iqtisadi əməkdaşlığın daha da inkişafı baxımından böyük əhəmiyyət daşıyır. Əminik ki, bu səfər sənaye kooperasiyasının inkişafına, birgə infrastruktur layihələrinin reallaşdırılmasına və Avropa ilə Asiyanı Azərbaycan üzərindən birləşdirən nəqliyyat dəhlizinin təşviqinə güclü təkan verəcək. Qazaxıstan ictimaiyyəti bu səfəri səmimiyyətlə qarşılayır. Əminik ki, birgə inkişaf və ortaq gələcək üçün ölkələrimizin böyük potensialı mövcuddur”, – deyə parlament üzvü vurğulayıb.
Bölmənin digər xəbərləri
