Qazi Araz Məlikov: “Güclü Ermənistan ordusu” mifi Aprel döyüşlərində ifşa olundu
Bakı, 4 aprel, AZƏRTAC
Aprel döyüşləri zamanı döyüş bölgəsinə yaxın ərazidə təlim keçirdik. Anidən düşmənin hücuma keçməyi barədə xəbər gəldi və döyüş zonasına getmək barədə əmr aldıq. Əraziyə yaxınlaşanda ordumuzun bölmələrindən birinin mühasirədə olduğunu gördük. Bölmələrimizi mühasirədən xilas etmək üçün düşmən üzərinə hücuma keçdik. Tərtər rayonunun Talış kəndi istiqamətində aparılan hərbi əməliyyatlar zamanı düşmənin xeyli canlı qüvvəsini məhv etdik, postlarını ələ keçirdik. Ermənilər postları, yüksəklikləri itirəndən sonra daha da azğınlaşdılar. Dəfələrlə hücum edir, itirdiklərini geri qaytarmağa cəhd edirdilər. Ordumuz isə düşmənin hər həmləsini boşa çıxarırdı, onlar itki verib geri çəkilməli olurdular. Düşməndən təmizlənən bütün strateji yüksəkliklər uğrunda amansız mübarizə gedirdi.
Bunu AZƏRTAC-a müsahibəsində Aprel döyüşlərinin iştirakçısı, Xüsusi Təyinatlı Qüvvələrin giziri, qazi Araz Məlikov deyib.
Qazi söhbətinə belə davam edib: “Biz Aprel döyüşləri başlayan zaman təlimdə olduğumuzdan kiçikçaplı silahlarla irəli atılmışdıq. Ermənilər isə üzərimizə tanklarla, BTR-lərlə gəlirdilər. Hücumun qarşısını alır, onların çox irəli gəlməsinə imkan vermirdik. Bir növ vaxt qazanmağa çalışırdıq. Minaatanlar gətiriləndən sonra düşmən texnikalarını məhv etdik. Şəxsi heyətləri çox itki verdi və geri çəkilməyə məcbur oldular. Bundan sonra döyüşlər daha da qızışdı. Hər yerdən əlləri üzülən ermənilər həmişə olduğu kimi qayda-qanunları pozaraq xislətlərinə uyğun davranış sərgiləməyə, bizi ağır artilleriya ilə vurmağa başladılar. O zaman tabor yoldaşlarımızdan bir neçəsi şəhid oldu. Əslində insanın ağır artilleriya ilə vurulması cinayət sayılır. Lakin qarşımızdakı düşmən öz barbarlığı, amansızlığı və qaniçənliyi ilə ad çıxarmış ermənilər idilər. Beləliklə onlar bu addımları ilə qorxacağımızı zənn edirdilər. Lakin biz bütün bunların əksinə olaraq irəli gedirdik. O zaman bizə elə güc gəlmişdi ki, sanki heç bir güllə dəyməyəcəkmiş kimi hiss edirdik. Gözümüzün qarşısında şəhid olan dostlarımızın qisasını almaq və bu döyüşdən qalib ayrılmaq naminə ancaq və ancaq irəli atılırdıq. Döyüşə-döyüşə şəhidlərimizi, yaralılarımızı savaş meydanından çıxararaq təxliyə qruplarına təhvil verirdik. Ağır artilleriyanın qarşısında cəsarətlə dayanmağımız, bütün situasiyalarda soyuqqanlı davranaraq vəziyyəti xeyrimizə dəyişməyimiz bu savaşı qazanmaq inamımızı və əzmimizi daha da artırırdı. Buna da nail olduq və düşmənin illərdir özünü inandırmağa çalışdığı “güclü Ermənistan ordusu” mifi Aprel döyüşlərində ifşa olundu”.
Müharibənin yazılmamış qanunları olduğunu, irəli atılan hər bir döyüşçünün şəhid olacağı ehtimalını dərk etdiyini bildirən A.Məlikov Aprel döyüşləri zamanı yaralandığı anı belə xatırlayır: “Döyüş yoldaşlarımdan biri - Afiyəddin Əliyev minaya düşərək yaralandı. Onu döyüş meydanından çıxaran zaman atəş zərbələri daha da şiddətləndi. Ağır artilleriyanın aramsız zərbələrinə məruz qalırdıq. Ermənilər bizi 120 millimetrlik minaatan mərmiləri, smerçlər, qradlarla vurmağa çalışırdılar. Yaxınlığımıza mərmi düşməsi nəticəsində zərbənin təsirindən təpədən aşağı yuvarlandıq. Yenə də yaralını buraxmadıq və təxliyə etdik. Digər yaralılarımıza kömək etmək məqsədilə yenidən döyüş meydanına qayıtdıq. Döyüş zonasına müxtəlif tərəflərdən daxil olaraq yaralıları təxliyə edə bildik. Bircə onu xatırlayıram ki, çox yaxınlığıma artilleriya mərmisi düşdü. Ondan sonrası zülmət qaranlıqdır. Gözlərimi açanda Gəncə hospitalında idim. Kəllə-beyin travması və çoxsaylı qəlpə yaraları almışdım, qulaqlarımın hər ikisi batmışdı. Əməliyyatdan sonra qulaqlarımdan birinin eşitmə qabiliyyəti bərpa olundu. Digər qulağım da əməliyyat olunacaq. Aldığım yaralara görə 2017-ci ildə ordu sıralarından tərxis olundum. Doqquz illik xüsusi təyinatlı qüvvələr mənsubu kimi xidmət dövrümün bitməsinə çox təəssüflənsəm də qalib hərbçi kimi xidməti başa vurmaq mənə təsəlli verirdi.
Hələ Aprel döyüşlərindən əvvəl də düşmən təxribatlarının qarşısını alarkən düşmənin gücünə və döyüş taktikasına bələd olmuşduq. Belə bir qayda var ki, qalib gəlmək istəyirsənsə, heç vaxt qarşı tərəfi özündən zəif bilməməlisən. Lakin döyüş tapşırıqlarını yerinə yetirərkən görürdük ki, Azərbaycan Ordusu düşməndən qat-qat güclüdür. Biz hər cəhətdən onları qabaqlayırdıq. Ən böyük üstünlüyümüz isə doğma torpaqlarımızda savaşmağımız idi, bu isə bizə əlavə güc verirdi. Çox əmin idim ki, müharibə olsa, qalib gələcəyik. Birinci Qarabağ müharibəsi dövründə də güclü döyüşçülərimiz olub. Lakin ordu quruculuğunun olmaması, silah-sursat çatışmazlığına görə istənilən nəticə əldə edilməyib. Biz onların qəhrəmanlığından, çətin şəraitdə göstərdikləri şücaətdən güc almış, həmin döyüşçülərdən örnək götürmüşük. Sadəcə olaraq ovaxtkı qeyri-bərabər döyüş şəraitində üstünlüyü ələ keçirən ermənilər özlərinə məğlubedilməzlik donu biçmişdilər. Ulu Öndər Heydər Əliyevin və onun siyasi kursunun layiqli davamçısı Ali Baş Komandan, Prezident İlham Əliyevin rəhbərliyi ilə Azərbaycan Ordusunun hərbi qulluqçularının peşəkarlığının artırılması, maddi-texniki bazanın gücləndirilməsi istiqamətində aparılan islahatlar çox keçmədən öz nəticəsini vermişdi. Sonrakı dövrlərdə aparılan bir neçə hərbi əməliyyat zamanı Azərbaycan Ordusu əsl gücünü ortaya qoya bilmişdi. Aprel döyüşlərindən əvvəl də təxribatlara əl atan ermənilər dəfələrlə uğursuzluğa düçar olsalar da, ağır itki verib geri çəkilsələr də zəif olduqlarını ört-basdır eləməyə çalışırdılar. Elə döyüş tapşırıqlarımız olub ki, 10-12 nəfərlə ermənilərin xüsusi təyinatlı taborunu məhv eləmişik. Aprel döyüşləri Ermənistan ordusunun qazandığı ilk ağır məğlubiyyət olmaqla yanaşı, onların Azərbaycan Ordusundan dəfələrlə zəif olduğunu gün üzünə çıxardı. Aprel döyüşləri böyük Zəfərə bir cığır, bir yol açdı. O yolu isə igid oğullar 44 günə qət etdilər. Vətən müharibəsində iştirak edə bilməsəm də Qələbənin təməlini qoyanlar arasında olmaq qürurvericidir. Ərazi bütövlüyümüz uğrunda canını fəda edən qəhrəmanlarımızı, igid döyüş yoldaşlarımızı dərin ehtiramla xatırlayacaq, onları son nəfəsimizə qədər unutmayacaq, göstərdikləri şücaəti nəsillərdən-nəsillərə ötürəcəyik”.
Bölmənin digər xəbərləri
