Qazi Aslan Nuriyev: Düşmənin belini qırdıq, tarixi torpaqlarımızı azad etdik VİDEO
Lənkəran, 22 oktyabr, İsmayıl Cəfərli, AZƏRTAC
Beş il öncə - 2020-ci ilin sentyabrın 27-də Vətən müharibəsi başlayanda xalqımızın igid, vətənpərvər övladları düşməndən qisas almaq, uzun illərdir əsarətdə qalan torpaqlarımızı azad etmək üçün döyüşlərə qatıldı. Tariximizin şanlı səhifəsinə öz adını yazdıran qəhrəman həmvətənlərimizdən biri də Aslan Qafar oğlu Nuriyevdir.
AZƏRTAC xəbər verir ki, torpaqlarımızın düşməndən azad edilməsi uğrunda hərbi əməliyyatlarda iştirak edərək qazi adını qazanan Vətən övladlarımız da xatirələrini daim uca tutduğumuz şəhidlərimiz kimi heç vaxt unudulmurlar. Qəhrəman qazilərimizin keçdiyi şərəfli döyüş yolu böyüməkdə olan gənc nəslə örnək olaraq göstərilir.
1990-cı il noyabrın 10-da Lənkəran rayonunun Hirkan qəsəbəsində dünyaya gələn Aslan Qafar oğlu Nuriyev Vətən müharibəsində snayperçi olub. Qəhrəman qazi beş il öncə müharibəyə qatılmasını və döyüşləri belə xatırlayır: “Ordumuzun gücünün artdığını görüb, qürur duydum. Ali Baş Komandanın rəhbərliyi altında döyüş meydanında düşmənin belini qıraraq, tarixi torpaqlarımızı azad etdik, ərazi bütövlüyümüzü tam bərpa etdik. Müharibə günləri bizim üçün həm ağır, həm də qürurverici idi. Mən o günləri fəxrlə xatırlayıram. Döyüşçü dostlarımızı, şəhid qardaşlarımızı unuda bilmərəm. Arzum var idi ki, Şuşaya kimi döyüşüm. Bu, mənə qismət olmadı, Qubadlı döyüşlərində ağır yaralandım. Dörd gün sonra ayıldım və özümü xəstəxanada gördüm. Qubadlı döyüşləri son döyüşlərim oldu. Oktyabrın 21-də döyüş meydanından təxliyə olundum”.
Aslan Nuriyev həqiqi hərbi xidmətini başa vurandan sonra ordu sıralarında müddətdən artıq həqiqi hərbi xidmət qulluqçusu kimi çalışmağa başlayıb. 2016-cı ilin aprel ayında qoşunların təmas xəttində düşmən həmləsinin qarşısının alınmasında da igidliklə döyüşən Aslana, 2020-ci ilin sentyabr ayında döyüş tapşırığını yerinə yetirmək üçün bildiriş gəlir. O, bu xəbəri ilk olaraq orta məktəbdən ən çox sevdiyi riyaziyyat müəllimi Elçin Ağayev ilə paylaşır. “Sentyabrın 25-i Aslan bizə gəldi. Dedi ki, müəllim xeyir-duanızı verin. Döyüşlərə yollanıram. Dedim, Aslan, haradan bilirsən ki, döyüşlər başlayır. Dedi, könüllü müraciət etmişəm, məktub gəlib, Ali Baş Komandan əmr verib. Aslan ertəsi gün ordu sıralarına qatıldı. Döyüşlər vaxtı onunla əlaqə saxlayırdım. Məktəbdə oxuduğu müddətdə çox vətənpərvər şagird kimi böyümüşdü. Aslan kimi qazilərimizə, şəhidlərimizə borcluyuq. Onların qarşısında baş əyirik. Onlar torpaqlarımızı azad etdilər”, - deyə Aslanın riyaziyyat müəllimi bildirir.
Bu müharibə Müzəffər Ali Baş Komandan İlham Əliyevin qətiyyəti və iradəsi ilə ordumuzun gücünü, xalqımızın birliyini dünyaya göstərdi. Bu şanlı Qələbəmiz dünya hərb tarixinə 44 günlük müharibə kimi düşsə də, Vətən müharibəsi adı altında tariximizə qızıl hərflərlə yazıldı.
Aslanın anası Məhbubə xanım deyir ki, oğlunun mərdliyi ilə həmişə fəxr edib: “Oğlum vətəndaşlıq borcunu yerinə yetirdi. Qalib kimi evinə qayıtdı. Mən onunla qürur duyuram. Müharibəyə gedəndə dedim, “oğlum getmə, körpə övladın var”. Dedi ki, “ana mən ölməyə yox, öldürməyə gedirəm”. Mən də ona güvənib, halallaşıb, yola saldım. Müharibədə qızğın döyüşlər gedirdi. Qubadlı döyüşlərində yaralandı. Biz bilmirdik. Üç gün komada qalıb, sonra həkimlər bizimlə əlaqə saxladılar, o vaxt yaralandığını bildik. Şükürlər olsun ki, sağ-salamat yanımızdadır”.
Bu gün qəhrəman hərbçimizin sinəsini “Qubadlının azad olunmasına görə”, “Cəbrayılın azad olunmasına görə”, “Cəsur döyüşçü” medalları bəzəyir. Qeyd edək ki, Aslan iki övlad atasıdır.
Bölmənin digər xəbərləri
