Qazi: Dörd nəfərdən ibarət ailəmiz üçotaqlı mənzillə təmin olunub
Bakı, 27 dekabr, AZƏRTAC
Ölkəmizdə şəhid ailələrinə və müharibə əlillərinə daim yüksək səviyyədə dəstək göstərilir. Mənə ikinci qrup əlillik təyin olunub. Əmək və Əhalinin Sosial Müdafiəsi Nazirliyi tərəfindən özünüməşğulluq proqramlarına dəvət edilmişəm. Dörd nəfərdən ibarət ailəmiz bir neçə gün əvvəl üçotaqlı mənzillə təmin olunub. Bununla yanaşı, “YAŞAT” Fondu istehlak kreditimin bağlanmasına kömək edib.
Bu sözləri AZƏRTAC-a müsahibəsində xüsusi təyinatlı qüvvələrin kapitanı, Vətən müharibəsi qazisi İlkin Rüstəmov deyib.
Kapitan Vətən müharibəsində iştirakını belə xatırlayır: “Vətən müharibəsi başlayanda doqquz il idi ki, xüsusi təyinatlı qüvvələrin mənsubu kimi xidmət edirdim. Müharibə başlayandan sonuncu atəş səsi eşidilən günədək ərazi bütövlüyümüz uğrunda aparılan hərbi əməliyyatlarda iştirak etmişəm. Döyüş yolum Füzuli rayonundan başlasa da, sonralar Cəbrayıl, Xocavənd və Şuşadan keçib. Yaralansam da, silahı əlimdən yerə qoymadım və axıra qədər mübarizəni davam etdirdim”.
O, söhbətinə belə davam edib: “Oktyabrın 22-də günortaya yaxın idi. Füzuli rayonunun Qarğabazar kəndi ərazisində güclü artilleriya atəşinə məruz qaldıq. Top mərmisinin yaxınlığıma düşməsi nəticəsində ayağımdan və bədənimdən yaralandım. Lakin döyüş meydanını tərk etmədim, özümə ilkin tibbi yardım göstərərək vuruşu davam etdirdim. Şuşa uğrunda döyüşmək də nəsibim oldu və Zəfəri döyüş meydanında yaşadım”.
Xatırladaq ki, Vətən müharibəsi qazisi İlkin Rüstəmov “Vətən uğrunda”, “Cəbrayılın azad olunmasına görə”, “Füzulinin azad olunmasına görə”, “Şuşanın azad olunmasına görə” və “Hərbi xidmətdə fərqlənməyə görə” medalları ilə təltif olunub.
Bölmənin digər xəbərləri
